30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Սպիտակ տան և Հարիսի նստավայրի շուրջ անվտանգության պատնեշներ են տեղադրվել
Քաղաքականություն
04.11.2024 | 21:43
Վաշինգտոնում անվտանգության պատնեշներ են տեղադրվել Սպիտակ տան, Կապիտոլիումի և փոխնախագահ, Դեմոկրատական կուսակցության նախագահի թեկնածու Քամալա Հարիսի նստավայրի շուրջ, հայտնում է The Washington Post (WP) պարբերականը։
Լրացուցիչ պաշտպանության միջոցներ են ձեռնարկվել նախագահական ընտրությունների նախաշեմին և քվեարկության արդյունքների հրապարակումից հետո անկարգությունների մտավախության պատճառով։ Սակայն Վաշինգտոնի ոստիկանությունը պաշտոնապես հայտարարել է, որ անվտանգության սպառնալիք չկա։
Չնայած ոստիկանության հայտարարությանը՝ WP-ն գրում է, որ ընտրություններին նախորդող օրերին ԱՄՆ գաղտնի ծառայությունը ութ ոտնաչափ (2,4 մ) բարձրությամբ մետաղական ցանկապատ է կանգնեցրել որոշ կառավարական շենքերի մոտ: Դրանց թվում են Ֆինանսների նախարարությունը և Ռազմածովային աստղադիտարանը։ Կապիտոլիումում տեղադրվել են նաև «Ոստիկանական գիծ. չհատել» նախազգուշացումներով ցուցանակներ։
«Այս բարելավումները որևէ կոնկրետ հարցի պատասխան չեն, այլ երեքշաբթի կայանալիք ընտրությունների ժամանակ հանրային անվտանգությունն ապահովելու ավելի լայն նախապատրաստման մաս»,- ասվում է գաղտնի ծառայության տարածած հայտարարության մեջ:
WP-ն նշում է, որ մասնավոր ձեռնարկությունները ևս պաշտպանական ամրություններ են տեղադրել պատուհանների և մուտքերի մոտ: Վաշինգտոնի Բնակարանների և գրասենյակային շենքերի ասոցիացիայի փոխնախագահ Էրիկ Ջոնսն ասել է, որ անվտանգության ուժեղացված միջոցառումները պայմանավորված են ձեռնարկատերերի վախով։ Նրա խոսքով՝ իրենք վախենում են 2021 թվականի հունվարին քաղաքում տեղի ունեցած անկարգությունների կրկնությունից։
Թարգմանությունը՝ Տաթև Ֆռանգյանի
