30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ղազախստանին առաջարկել են դառնալ BRICS-ի գործընկեր
Քաղաքականություն
02.11.2024 | 13:46
Ղազախստանին առաջարկել են դառնալ BRICS կազմակերպության գործընկեր։ Ինչպես տեղեկացնում է «Արմենպրես»-ը, այդ մասին հայտնել է Ղազախստանում ՌԴ դեսպան Ալեքսեյ Բորոդավկինը։
«Վերջերս Կազանում կայացած BRICS-ի գագաթնաժողովում ստեղծվեց գործընկեր պետությունների նոր կատեգորիա, 13 պետություն հրավիրվեց միանալու կառույցին, այդ թվում՝ Ղազախստանը: Վստահ եմ, որ այդ որոշման նշանակությունը միայն կբարձրանա դեպի ավելի արդար, բազմաբևեռ աշխարհակարգ անցնելիս»,-ասել է Ալեքսեյ Բորոդավկինը։
Ռուս դիվանագետը հույս է հայտնել, որ Ղազախստանի մայրաքաղաքում փորձագետների հանդիպումը կշարունակի քննարկումը ոչ միայն BRICS-ի գագաթնաժողովի, այլև հոկտեմբերի 31-ից նոյեմբերի 1-ը Մինսկում կայացած Եվրասիական անվտանգության միջազգային համաժողովի արդյունքների շուրջ։ Դեսպանը նշել է Ղազախստանի հավասարակշռված և կառուցողական արտաքին քաղաքականությունը և Աստանայի ակտիվ դերը Կենտրոնական Եվրասիայում տարածաշրջանային կայունության պահպանման գործում։
