09.09.2026 | 17:08
Մեղրիի համայնքապետը ձերբակալվել է․ գործով կա 8 ձերբակալված
Ստամբուլի շրջաններից մեկի ընդդիմադիր ղեկավարը ձերբակալվել է PKK-ի հետ կապերի կասկածանքով
Քաղաքականություն
30.10.2024 | 21:38
Ստամբուլի Էսենյուրթ շրջանի քաղաքապետ, գլխավոր ընդդիմադիր Ժողովրդահանրապետական կուսակցության (CHP) անդամ Ահմեդ Օզերը ձերբակալվել է այսօր իր տանը տեղի ունեցած խուզարկությունից հետո, գրում է Bianet-ը։
Վաղ առավոտյան ոստիկանները խուզարկել են նրա տունը, միաժամանակ, խուզարկություն է իրականացվել վարչական շրջանի շենքում։ Ստամբուլի գլխավոր դատախազությունն Օզերի ձերբակալությունից հետո տարածած հայտարարության մեջ ներկայացրել է մեղադրանքները։ Դրանց համաձայն՝ Օզերը կասկածվում է Քուրդիստանի աշխատավորական կուսակցության (PKK) և նրա հովանավոր կազմակերպության՝ Քուրդիստանի համայնքների միության (KCK) հետ կապեր պահպանելու մեջ։
Իշխանությունները պնդում են, որ ապացույցներ են ձեռք բերել գաղտնալսումների, հսկողության և ֆինանսական փաստաթղթերի միջոցով, որոնք Օզերին կապում են Հյուսիսային Իրաքում կազմակերպության ղեկավարության և PKK-ի հայտնի գործիչների հետ: Նրան մեղադրում են PKK/KCK-ի հետ «կայուն և ինտենսիվ կապ հաստատելու» մեջ, ինչը հանգեցրել է «ահաբեկչական կազմակերպությանն անդամակցելու» մեղադրանքին։
Ստամբուլի քաղաքապետ Էքրեմ Իմամօղլուն, որը նույնպես CHP-ի անդամ է, X-ի միկրոբլոգում իր աջակցությունն է հայտնել Օզերին։
«Այսօր առավոտյան ձերբակալվել է մեր Էսենյուրթի քաղաքապետ, պրոֆեսոր Ահմեդ Օզերը: Մենք ուշադիր հետևում ենք իրավիճակին։ Պարոն Օզերը վաստակաշատ գիտնական է և տեղական ադմինիստրատոր, որն աշխատել է նահանգում և զբաղեցրել բարձր պաշտոններ համալսարաններում՝ դեկանից մինչև պրոռեկտոր: Թուրքիան պետք է դադարի լինել մի երկիր, որտեղ առավոտյան ռեյդեր են իրականացվում քաղաքական գործիչների և գիտնականների դեմ»,- գրել է Իմամօղլուն։
Թարգմանությունը՝ Էմմա Չոբանյանի
