Արգիշտի Քյարամյանի՝ ԱԺ-ում արած հայտարարությունների վերաբերյալ քրեական վարույթ է նախաձեռնվել

Քննչական կոմիտեի նախագահ Արգիշտի Քյարամյանի՝ ԱԺ-ում արած հայտարարությունների վերաբերյալ քրեական վարույթ է նախաձեռնվել: Այս մասին Factor.am-ին հայտնում են Գլխավոր դատախազության լրատվության և հասարակության հետ կապերի վարչությունից:

Հիշեցնենք, որ հոկտեմբերի 15-ին Ազգային ժողովում միջադեպ է տեղի ունեցել Արգիշտի Քյարամյանի և «Քաղաքացիական պայմանագիր» խմբակցության պատգամավոր Հովիկ Աղազարյանի միջև: Վիճաբանության ընթացքում նրանք այնպիսի հանգամանքների մասին են հայտարարել, որոնք առերևույթ կարող են հանցագործության հատկանիշներ պարունակել:

«Պարոն Աղազարյան, խնդրում եմ նաև մեկնաբանեք, թե ինչով է պայմանավորված, որ առնվազն երկու անգամ ինձ դիմել են Ձեր տղայի հետ կապված քրեական գործով՝ մեքենաները հենց նույն այդպիսի վարույթներով վերադարձնելու վերաբերյալ։ Բա եթե մենք խոսում ենք կոռուպցիայի դեմ պայքարից, հովանավորչությունից, խնդրում եմ պատասխանեք այս հարցին»,- Աղազարյանին դիմելով՝ ասել է Արգիշտի Քյարամյանը:

«Դուք ինչո՞ւ չեք իմ տղայի հետ կապված քրեական գործը հասցնում մինչև վերջ, միգուցե պահում եք, որ հետո նվիրեք պարոն Լևոն Քոչարյանի՞ն։ Ես իմ տղային հրահանգել եմ, որ ինքը որևէ կոմպրոմիսի չգնա, և թող գործը գնա դատարան։ Հետևաբար, պարոն Քյարամյան, Դուք լրիվ ապացուցում եք, որ Դուք որպես ճնշման միջոց եք օգտագործում», – արձագանքել է Հովիկ Աղազարյանը՝ պնդելով նաև, որ Քյարամյանը հայտնի, թե ով է իր որդու գործով դիմել նրան:

Քրեական վարույթը նախաձեռնվել է Քրեական օրենսգրքի 486-րդ հոդվածի 1-ին մասով, այսինքն՝ արդարադատության իրականացմանը կամ գործի քննությանը միջամմտելը։

Արաքս Մամուլյան