30.04.2026 | 22:58
«Նուբարաշեն-Արին-Բերդ» ջրատարի վթարման հետևանքով Երևանի և Արարատի մարզի մի շարք հասցեներում 21 ժամ ջուր չի լինի
ԵՄ-ն Վրաստանին կոչ է անում հետաքննել ընտրախախտումները
Քաղաքականություն
28.10.2024 | 11:50
Եվրամիությունն (ԵՄ) ուշադրությամբ հետևել է խորհրդարանական ընտրություններին տանող զարգացումներին։ Անցած ամիսների ընթացքում Վրաստանի ժողովուրդը ցույց է տվել իր կապվածությունը ժողովրդավարական արժեքներին և հավատարմությունը ԵՄ ուղուն: Այս մասին ասվում է ԵՄ արտաքին հարաբերությունների և անվտանգության քաղաքականության հարցերի բարձր ներկայացուցիչ, Եվրահանձնաժողովի փոխնախագահ Ժոզեպ Բորելի հայտարարության մեջ։
«ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) գլխավորած Ընտրությունների միջազգային դիտորդական առաքելության նախնական եզրակացությունների համաձայն՝ ընտրությունների օրը, ընդհանուր առմամբ, ընթացակարգային առումով լավ կազմակերպված էր, բայց առանձնանում էր լարված միջավայրով, քվեարկության գաղտնիության հաճախակի խախտումներով և մի շարք ընթացակարգային անհամապատասխանություններով, ինչպես նաև ընտրողներին վախեցնելու և ճնշումների մասին հաղորդումներով, որոնք բացասաբար են ազդել ընտրողների նկատմամբ հանրային վստահության գործընթացի վրա։ Ընտրողների, մասնավորապես, պետական հատվածի աշխատողների վրա ճնշումների մասին հաղորդումները լայնորեն տարածվել են ամբողջ քարոզարշավի ընթացքում»,- ասվում է հայտարարության մեջ։
Նշվում է, որ դիտորդները զեկուցում են անհավասար մրցակցային դաշտի, բևեռացված մթնոլորտում պառակտող քարոզարշավի և այս ընտրական գործընթացի վրա վերջին օրենսդրական փոփոխությունների ազդեցության վերաբերյալ զգալի մտահոգությունների մասին:
«Մենք կոչ ենք անում Վրաստանի Կենտրոնական ընտրական հանձնաժողովին և այլ համապատասխան մարմիններին կատարել իրենց պարտականությունը՝ արագ, թափանցիկ ու անկախ հետաքննելու ընտրական խախտումներն ու դրանց վերաբերյալ պնդումները։ Այդ խախտումները պետք է պարզաբանվեն և լուծվեն։ Դա անհրաժեշտ քայլ է ընտրական գործընթացի նկատմամբ վստահության վերականգնման համար»,- ընդգծել է Բորելը։
Նա նշել է, որ ԵՄ-ն անհամբերությամբ սպասում է ԵԱՀԿ/ԺՀՄԻԳ-ի վերջնական զեկույցին և առաջարկություններին, որոնք պետք է իրականացվեն հնարավորինս շուտ:
«Քաղաքական սպեկտրում կառուցողական և ներառական երկխոսությունն այժմ առաջնային է: Հոկտեմբերի 17-ի Եվրոպական խորհրդի եզրակացություններին համապատասխան՝ ԵՄ-ն Վրաստանին կոչ է անում ընդունել ժողովրդավարական, համապարփակ և կայուն բարեփոխումներ՝ եվրոպական ինտեգրման հիմնական սկզբունքներին համապատասխան: Այս համատեքստում ԵՄ-ն հիշեցնում է, որ ցանկացած օրենսդրություն, որը խաթարում է Վրաստանի քաղաքացիների հիմնարար իրավունքներն ու ազատությունները և հակասում այն արժեքներին ու սկզբունքներին, որոնց վրա հիմնված է ԵՄ-ն, պետք է չեղյալ համարվի»,- նշվում է հայտարարության մեջ։
Թարգմանությունը՝ Էմմա Չոբանյանի
