Մեջլիսը Եվրախորհրդարանին մեղադրել է Ադրբեջանի ներքին գործերին խառնվելու և ՀՀ «ռազմականացումը» խրախուսելու մեջ

Մենք կտրականապես մերժում ենք Ադրբեջանի վերաբերյալ Եվրախորհրդարանի բանաձևը։ Այս մասին ասվում է Ադրբեջանի Միլլի Մեջլիսի հայտարարության մեջ՝ կապված հոկտեմբերի 24-ին Եվրախորհրդարանի կողմից ընդունված «Իրավիճակն Ադրբեջանում, մարդու իրավունքների և միջազգային իրավունքի խախտումներն ու հարաբերությունները Հայաստանի հետ» վերտառությամբ բանաձևի հետ։

«Այս ինստիտուտը, դիրքավորվելով որպես եվրոպական պառլամենտարիզմի դեմք, մի կողմ է թողել հին մայրցամաքի բոլոր խնդիրները և կրկին հարձակվում է մեր երկրի վրա։ Եվրախորհրդարանը որոշել է ցույց տալ իր հակաադրբեջանական տրամադրությունների բոլոր երանգները։ Բանաձևում ներկայացված են անհեթեթ պնդումներ ու մեղադրանքներ, սպառնալիքներ ու պահանջներ՝ հիմնված Ադրբեջանի հասցեին կեղծ տվյալների վրա։ Բացահայտ անհարգալից վերաբերմունք կա մեր երկրի տարածքային ամբողջականության և ինքնիշխանության նկատմամբ, փորձեր են արվում միջամտել մեր ներքին գործերին։ Միաժամանակ, Հայաստանի նկատմամբ ցուցաբերվում է առանձնահատուկ վերաբերմունք, խրախուսվում է նրա ռազմականացումը, որը ծառայում է այս երկրում ռևանշիստական ​​միտումների ամրապնդմանը և տարածաշրջանում հակամարտությունը վերսկսելուն»,- ասվում է Մեջլիսի հայտարարությունում։

Ըստ հայտարարության՝ Ադրբեջանի հետ «չի կարելի խոսել ճնշման և վերջնագրի լեզվով» և «հենվել Ֆրանսիայի, Հայաստանի և հայկական լոբբիի կեղծ պատմությունների վրա»։ Մեջլիսը բանաձևը համարում է, իբր, «Եվրախորհրդարանում արմատացած կոռուպցիայի և կաշառակերության լուրջ հետևանք»։

«Ադրբեջանի Միլլի Մեջլիսը կտրականապես մերժում է Եվրախորհրդարանի կողմնակալ և միակողմանի բանաձևը, որը խեղաթյուրում է իրականությունը»,- ասվում է հայտարարության մեջ։

Նշենք, որ Ադրբեջանի վերաբերյալ բանաձևն ընդունվել է 453 կողմ, 31 դեմ, 89 ձեռնպահ ձայներով։ Փաստաթղթով Եվրախորհրդարանի պատգամավորները խստորեն դատապարտում են Ադրբեջանի իշխանությունների բռնաճնշումներն ընդդիմության առաջնորդների, լրագրողների, ակտիվիստների նկատմամբ երկրի ներսում և դրա սահմաններից դուրս։ Բանաձևում անդրադարձ է կատարվում նաև Արցախում Ադրբեջանի իրականացրած էթնիկ զտումներին, հայ-ադրբեջանական հարաբերությունների կարգավորման գործընթացին։

Թարգմանությունը՝ Էմմա Չոբանյանի