22.11.2024 | 23:56
Սահմանադրության փոփոխության օրակարգը բանակցային սեղանին չենք քննարկել. Նիկոլ Փաշինյան. ՏԵՍԱՆՅՈՒԹ
Բայրամովն ու Հաջիևը դեսպանների հետ հանդիպմանը բողոքել են Հայաստանի Սահմանադրությունից ու «ռազմականացումից»
Քաղաքականություն
23.10.2024 | 10:57
Ադրբեջանի ԱԳ նախարար Ջեյհուն Բայրամովն ու երկրի նախագահի օգնական Հիքմեթ Հաջիևը նախօրեին հանդիպում են անցկացրել Բաքվում հավատարմագրված Իսլամական համագործակցության կազմակերպության անդամ երկրների դեսպանների հետ։
Ադրբեջանի ԱԳՆ-ի հաղորդմամբ՝ հանդիպմանը քննարկվել է «եղբայրական և բարեկամ մահմեդական երկրների հետ Բաքվի կապերի հետագա ընդլայնման կարևորությունը», COP29-ի անցկացումը, տարածաշրջանում իրավիճակը, մանրամասն քննարկվել են Հայաստանի հետ կարգավորման գործընթացի հեռանկարները և տարածաշրջանային անվտանգության այլ հարցեր։
Մանրամասն տեղեկացնելով Ադրբեջանի և Հայաստանի միջև հարաբերությունների կարգավորման գործընթացի մասին՝ Բայրամովը նշել է, որ կողմերն առավելագույն ջանքեր են գործադրում երկկողմ խաղաղ բանակցություններին և գործընթացին նպաստելու համար։ Արդյունքում «զգալի առաջընթաց է գրանցվել խաղաղության գործընթացում, պայմանավորվածություն է ձեռք բերվել սահմանի որոշակի հատվածի, հատկապես սահմանազատման հարցերի շուրջ, համաձայնեցվել են խաղաղության պայմանագրի բազմաթիվ դրույթներ»։
Բայրամովը, սակայն, դարձյալ խոսել է ՀՀ Սահմանադրությունից՝ պնդելով թե այն, իբր, տարածքային պահանջներ է պարունակում Ադրբեջանի նկատմամբ։
«Միաժամանակ նշվել է, որ Նյու Յորքում և Ստամբուլում մանրամասն քննարկումներ են ընթացել համաձայնագրի մնացած դրույթների շուրջ։ Նա նշել, որ Հայաստանի Սահմանադրության մեջ տարածքային պահանջների պահպանումը, որն ուղղված է մեր երկրի տարածքային ամբողջականությանը, սպառնում է կայուն խաղաղության կառուցմանն ուղղված ջանքերին։ Նաև ասվել է, որ Հայաստանի՝ նման քայլերից զերծ մնալու կարևորությունը, ինչպիսին է ռազմականացումը, որոնք կարող են հանգեցնել տարածաշրջանում էսկալացիայի»,-ասվում է տարածված հաղորդագրության մեջ։
Խոսելով COP29-ի անցկացման նախապատրաստման մասին՝ Հիքմեթ Հաջիևն էլ հայտարարել է, թե իբր «տարբեր անհիմն պատրվակներով փորձ է արվում վարկաբեկել Ադրբեջանի կողմից իրականացվող լայնածավալ աշխատանքը, անընդունելի ձևով ներառել այնպիսի հարցեր COP օրակարգում, ինչպիսիք են հայ-ադրբեջանական հարաբերությունների կարգավորման գործընթացը, «Ադրբեջանը նավթային երկիր է», մարդու իրավունքները»։ Նա ասել է, որ նման մոտեցումը անընդունելի է և Բաքուն պատրաստ է այդ հարցերը քննարկել այլ հարթակներում։
«Նշվել է, որ Ադրբեջանը հավատարիմ է Հայաստանի հետ խաղաղության գործընթացին, սակայն Հայաստանի առաջարկած կիսատ խաղաղության համաձայնագիրը անընդունելի է։ Ընդգծվել է խաղաղության պայմանագրի մնացած դրույթների համաձայնեցման կարևորությունը։ Միաժամանակ ասվել է, որ Հայաստանի ռազմականացումը տարածաշրջանում սպառնալիքի աղբյուր է»,- ասվում է հայտարարության մեջ։
Թարգմանությունը՝ Էմմա Չոբանյանի
