08.10.2026 | 15:44
Ռուսաստանը հարվածել է Կրամատորսկում ուղևորատար ավտոբուսների․ զոհվել է 30 մարդ, ևս 18-ը՝ վիրավորվել
Կազանում մեկնարկել է BRICS-ի գագաթնաժողովը․ Սերբիայի նախագահը հրաժարվել է մասնակցել
Քաղաքականություն
22.10.2024 | 12:03
Թաթարստանի մայրաքաղաք Կազանում մեկնարկել է BRICS-ի գագաթնաժողովը, որին կմասնակցեն շուրջ 40 միջազգային պատվիրակություններ, այդ թվում՝ առնվազն 24 երկրների ղեկավարներ։ Սերբիայի նախագահ Ալեքսանդր Վուչիչը ՌԴ նախագահ Վլադիմիր Պուտինին ասել է, որ չի մասնակցի հոկտեմբերի 22-24-ը կայանալիք գագաթնաժողովին, սակայն պատվիրակություն կուղարկի, գրում է DW-ի ռուսական ծառայությունը:
Սերբական պատվիրակության կազմում կլինեն փոխվարչապետ Ալեքսանդր Վուլինը, պաշտպանության նախարար Բրատիսլավ Գաշիչը, էկոնոմիկայի նախարար Ադրիանա Մեսարովիչը և միջազգային տնտեսական համագործակցության կուրատոր Նենադ Պոպովիչը։
Վուչիչը պարզաբանել է, որ հոկտեմբերի 23-ին Բելգրադ են այցելելու Լեհաստանի վարչապետ Դոնալդ Տուսկը և Հունաստանի վարչապետ Կիրիակոս Միցոտակիսը, իսկ ավելի ուշ ժամանելու է Եվրահանձնաժողովի նախագահ Ուրսուլա ֆոն դեր Լեյենը։ Բայց եթե նույնիսկ այս օրերին Սերբիա այցելություններ չլինեին, չափազանց դժվար կլիներ գնալ Ռուսաստան՝ Պուտինին քաջածանոթ տարբեր հանգամանքների պատճառով, հավելել է Սերբիայի նախագահը։
Ավելի վաղ Բրազիլիայի նախագահ Լուիս Ինասիո Լուլա դա Սիլվան չեղարկել էր իր թռիչքը Ռուսաստան՝ BRICS-ի գագաթնաժողովին մասնակցելու համար։ Բրազիլիայի Cirio Libanes հիվանդանոցի հրապարակած բժշկական զեկույցի համաձայն՝ քաղաքական գործչին «խորհուրդ է տրվել խուսափել միջպետական օդային ճանապարհորդություններից, սակայն նա այլ կերպ կարող է կատարել իր պարտականությունները»:
Սեպտեմբերին հայտնի դարձավ, որ ՆԱՏՕ-ի անդամ Թուրքիան BRICS-ին անդամակցության հայտ է ներկայացրել։ Հարավային Աֆրիկայի նախագահ Սիրիլ Ռամաֆոսան 2023 թվականի օգոստոսին հայտարարեց, որ Արգենտինան, Իրանը, Սաուդյան Արաբիան, Եգիպտոսը, Եթովպիան և Արաբական Միացյալ Էմիրությունները հրավիրվել են միանալու որպես լիիրավ անդամներ։ Արգենտինան ավելի ուշ հրաժարվել է այս քայլից։
BRICS-ի ստեղծումը նախաձեռնել է ռուսական կողմը։ Կազմակերպության ձևաչափով առաջին նախարարական հանդիպումը տեղի է ունեցել 2006 թվականի սեպտեմբերի 20-ին Նյու Յորքում՝ ՄԱԿ-ի Գլխավոր վեհաժողովի նստաշրջանի շրջանակում:
Թարգմանությունը՝ Տաթև Ֆռանգյանի
