22.11.2024 | 09:36
ՀՀ տարածքում ավտոճանապարհներն անցանելի են
Իսրայելն ԱՄՆ-ին է փոխանցել Լիբանանում պատերազմը դադարեցնելու իր պայմանները․ Axios
Քաղաքականություն
21.10.2024 | 17:40
Իսրայելի վարչապետի աշխատակազմն անցյալ շաբաթ փաստաթուղթ է ուղարկել Սպիտակ տուն, որտեղ նկարագրված են Լիբանանի հակամարտության դիվանագիտական կարգավորման իր պայմանները: Axios-ը, վկայակոչելով Վաշինգտոնի և Թել Ավիվի աղբյուրներին, գրում է, որ ԱՄՆ նախագահի հատուկ բանագնաց Ամոս Հոխշտեյնը հոկտեմբերի 21-ին Բեյրութ կատարած այցի ժամանակ պետք է այս ծրագիրը ներկայացնի Լիբանանի կառավարությանը։
Իսրայելի անանուն պաշտոնյայի խոսքով՝ փաստաթուղթը կազմվել է Իսրայելի ռազմավարական հարցերի նախարար Ռոն Դերմերի և Պաշտպանության նախարարության բանակցություններից հետո։ Հանդիպմանը քննարկվել է այն միջոցները, որոնք պետք է ներառվեն ««Հըզբոլլահ»-ի հետ պատերազմի ավարտին ուղղված ցանկացած դիվանագիտական լուծման մեջ»:
Թել Ավիվի պահանջներից մեկն այն է, որ Իսրայելի բանակին թույլ տրվի «ակտիվ գործել»՝ երաշխավորելու, որ «Հըզբոլլահ»-ը չի վերակառուցի իր ռազմական ենթակառուցվածքը Լիբանանի հարավային սահմանին: Իսրայելը նաև պահանջում է, որ երկրի ռազմաօդային ուժերը լիբանանյան օդային տարածքում գործողությունների լիակատար ազատություն ունենան։
Ամերիկացի անանուն պաշտոնյայի խոսքով՝ Լիբանանը և միջազգային հանրությունը դժվար թե համաձայնվեն Իսրայելի պահանջներին: Նա կարծում է, որ նախանշված պայմանները խաթարում են Լիբանանի ինքնիշխանությունը։
Նշվում է նաև, որ երկու պահանջներն էլ հակասում են ՄԱԿ-ի Անվտանգության խորհրդի 1701 բանաձևին, որը Իսրայելի և «Հըզբոլլահ»-ի միջև հրադադարի պահպանման պատասխանատվությունը դնում է Լիբանանի զինված ուժերի ու Լիբանանում ՄԱԿ-ի ժամանակավոր խաղաղապահ ուժերի վրա (UNIFIL):
Հոխշտեյնը ծրագրում է առաջ մղել առնվազն 8,000 լիբանանյան զորքերի տեղակայումը երկրի հարավային սահմանին: Վերջին տարիներին լիբանանյան բանակի ներկայությունն այնտեղ սահմանափակ է եղել, իսկ տարածքը վերահսկվում էր «Հըզբոլլահ»-ի կողմից։ ԱՄՆ նախագահի հատուկ բանագնացը մտադիր է նաև խնդրել UNIFIL-ի մանդատի ընդլայնում, որպեսզի նրանք կարողանան օգնել լիբանանցի զինվորականներին։
Թարգմանությունը՝ Տաթև Ֆռանգյանի
