Իսրայելը մտադիր է հարվածել Իրանի ռազմական, ոչ թե միջուկային կամ նավթային օբյեկտներին

Իսրայելը պատասխան հարված հասցնելիս թիրախավորելու է Իրանի ռազմական, ոչ թե միջուկային կամ նավթային օբյեկտները։ Այս մասին ԱՄՆ նախագահ Ջո Բայդենին հայտնել է Իսրայելի վարչապետ Բենիամին Նեթանյահուն, գրում է  DW-ի ռուսական ծառայությունը՝ հղում անելով The Washington Post-ը։ Խոսքն, ըստ ամենայնի, հեռախոսազրույցի մասին է, որը տեղի էր ունեցել երկու երկրների առաջնորդների միջև հոկտեմբերի 9-ին։

Լրատվամիջոցը նշում է, որ իսրայելական ծրագիրը՝ միայն հարվածելու Իրանի ռազմական օբյեկտներին, Վաշինգտոնում ընդունել են «թեթևությամբ»։ Վերլուծաբանները մտավախություն ունեն, որ իրանական նավթային օբյեկտների վրա հարձակումը կարող է հանգեցնել աշխարհում էներգակիրների գների աճի, իսկ միջուկային օբյեկտների վրա հարձակումը կարող է հետագա էսկալացիա հրահրել և ԱՄՆ-ին ներքաշել հակամարտության մեջ։ Բայդենն ավելի վաղ Իսրայելին կոչ էր արել «մտածել այլ տարբերակների մասին»։

The Washington Post-ը ընդգծում է, որ «ավելի զուսպ դիրքորոշումը», որն այժմ վերցրել է Նեթանյահուն, ազդել է ԱՄՆ նախագահի որոշման վրա՝ հզոր THAAD հակահրթիռային պաշտպանության համակարգը Մերձավոր Արևելքի դաշնակցին ուղարկելու վրա։ Պենտագոնը հոկտեմբերի 13-ին հայտարարել էր, որ Իսրայելում կտեղակայվի THAAD մարտկոց:

Վաշինգտոնում աղբյուրը լրատվամիջոցին հայտնել է, որ Իսրայելի հարվածն Իրանին պետք է տեղի ունենա նոյեմբերի 5-ին նշանակված ԱՄՆ նախագահական ընտրություններից առաջ, պարզաբանելով, որ եթե Իսրայելը չպատասխանի իր տարածքի զանգվածային հրթիռակոծմանը, Թեհրանում կարող են դա մեկնաբանել որպես թուլության նշան։

Բացի այդ՝ ԱՄՆ-ի հետ  հետ խորհրդակցությունների արդյունքում Իսրայելը հայտարարել է, որ կդադարեցնի գործողությունները Լիբանանում «առաջիկա շաբաթներին»։

Թարգմանությունը՝ Էմմա Չոբանյանի