23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Իսրայելի հարվածի հետևանքով Լիբանանի հյուսիսի քրիստոնեաբնակ շրջանում 21 մարդ է զոհվել
Քաղաքականություն
15.10.2024 | 11:07
Առնվազն 21 մարդ է զոհվել, ևս 8-ը վիրավորվել է Լիբանանի հյուսիսում Իսրայելի ավիահարվածի հետևանքով։ Այս մասին հայտնում է Լիբանանի առողջապահության նախարարությունը, գրում է BBC-ն։
Հարվածը հասցվել է հիմնականում քրիստոնյաներով բնակեցված Աիտու գյուղի բնակելի շենքերից մեկին։ Գյուղը հեռու է այն շրջաններից, որտեղ իսրայելական զինվորականները հազարավոր հարվածներ են հասցնում «Հըզբոլլահ» խմբավորմանը:
Իսրայելի վարչապետ Բենիամին Նեթանյահուն մինչ այս հայտարարել էր, որ «շարունակելու են անողոքաբար հարվածներ հասցնել «Հըզբոլլահ»-ին Լիբանանում ամենուր, ներառյալ՝ Բեյրութում»:
Աիտուն տեղակայված է ափամերձ Տրիպոլի քաղաքի մոտ գտնվող լեռներում․ տեղի բնակիչներն ասել են, որ ոչ մի նախազգուշացում չի եղել, միայն հզոր պայթյունի ձայնն են լսել: Այնուամենայնիվ, նրանք նաև ասել են, որ հարավում պատերազմի պատճառով տեղահանված մի քանի ընտանիք վերջերս տեղափոխվել է իրենց մոտ։
Լիբանանի անվտանգության աղբյուրը AFP-ին հայտնել է, որ շենքը «թիրախավորվել է այն բանից հետո, երբ մի տղամարդ է ժամանել մեքենայով»:
Լիբանանի առողջապահության նախարարությունը հայտնել է, որ ԴՆԹ թեստեր է անցկացնում՝ պարզելու փրկարարների կողմից հայտնաբերված մարմինների ինքնությունը:
Իսրայելը ռազմական գործողությունների հիմնական շեշտը դրել է արևելքում, Բեյրութի արվարձաններում և հարավում, որտեղ միջադեպեր են տեղի ունեցել նաև ՄԱԿ-ի խաղաղապահների մասնակցությամբ: Երկուշաբթի օրը Լիբանանում ՄԱԿ-ի ժամանակավոր ուժերի խոսնակն ասել է, որ հարավային Լիբանանում գտնվող խաղաղապահներն իրենց դիրքերից չեն շարժվի՝ կրկին հակադարձելով զորքերի դուրսբերման Իսրայելի կոչերին:
ՄԱԿ-ի Անվտանգության խորհուրդն էլ լուրջ մտահոգություն է հայտնել «Հըզբոլլահ»-ի դեմ իսրայելական ռազմական հարձակման ժամանակ ՄԱԿ-ի որոշ զինծառայողների վիրավորումների կապակցությամբ։
Թարգմանությունը՝ Էմմա Չոբանյանի
