Դաշինքն ամեն ինչ կանի, որպեսզի Պուտինը չհասնի իր նպատակներին Ուկրաինայում. ՆԱՏՕ-ի գլխավոր քարտուղար

ՆԱՏՕ-ն չի վախենում Ռուսաստանի սպառնալիքներից և կշարունակի ուժեղ աջակցություն ցուցաբերել Կիևին, հայտարարել է դաշինքի գլխավոր քարտուղար Մարկ Ռյուտեն Գերմանիայի Վիսբադեն բազա իր առաջին այցի ժամանակ։ Այս բազայում տեղակայված կլինի Ուկրաինային օգնության հիմնական համակարգող կենտրոնը։
«Ուղերձը [Ռուսաստանի նախագահ Վլադիմիր Պուտինին] այն է, որ մենք կշարունակենք անել այն, ինչ անհրաժեշտ է, որպեսզի նա չհասնի իր նպատակներին, և Ուկրաինան կհաղթի»,- ասել է նա Reuters-ին և Hesse Radio-ին տված հարցազրույցում:

Հեսսենի դաշնային նահանգի վարչական կենտրոնում գտնվող NATO Security Assistance and Training for Ukraine (NSATU) անվանումը ստացած Վիսբադենի համալիրն աստիճանաբար կստանձնի Կիևին արևմտյան ռազմական օգնության համակարգումը:
Այս քայլը շատերի կողմից դիտվում է որպես օգնության մեխանիզմը պաշտպանելու փորձ հանրապետական Դոնալդ Թրամփի՝ Սպիտակ տուն հնարավոր վերադարձից, նշում է Reuters-ը։

Ակնկալվում է, որ կենտրոնի ընդհանուր հզորությունը կկազմի մոտ 700 մարդ, այդ թվում՝ ուկրաինացի զինվորականները և ստորաբաժանումները, որոնք տեղակայված են Բելգիայում, Լեհաստանում և Ռումինիայում ՆԱՏՕ-ի օբյեկտներում:

Վիսբադենի բազայում տեղակայված է նաև ամերիկյան ստորաբաժանումը, որը պատասխանատու է հեռահար հրթիռների համար, որոնք Վաշինգտոնը ծրագրում է ժամանակավորապես տեղադրել Գերմանիայում 2026 թվականից՝ Կալինինգրադի մարզում ռուսական հրթիռների սպառնալիքին դիմակայելու համար, ավելացնում է գործակալությունը։

Թարգմանությունը՝ Տաթև Ֆռանգյանի