Թող անցնի և՛ Հայաստանով, և՛ Իրանով․ Թուրքիայի տրասնպորտի նախարարը դարձյալ խոսել է, այսպես կոչված, «Զանգեզուրի միջանցքի» մասին

Թուրքիայի ենթակառուցվածքների ու տրանսպորտի նախարար Աբդուլքադիր Ուրալօղլուն Kanal 7-ի հետ նախօրեի հարցազրույցում կրկին անդրադարձել է, այսպես կոչված, «Զանգեզուրի միջանցքին» ու դրա կապակցությամբ Իրանի դիրքորոշմանը։

«Երբ Իրանին այլևս պետք չէր Լաչինի միջանցքը, «Զանգեզուրի միջանցքի» հետ կապված հարցեր առաջացան։ Ասել, որ մեր երկիրը չպետք է լինի Չինաստանից Լոնդոն հասնող միջանցքի մաս, անհեթեթ է։ Հայկական կողմում էլ  կային որոշ ռեզերվներ»,-ասել է Ուրալօղլուն՝ նշելով, որ հաղորդակցությունների շուրջ Ադրբեջանն է վարում է  բանակցությունները, Անկարան  անմիջականորեն ներգրավված չէ։

«Երկու երկրներով էլ թող այն անցնի ։Ե՛վ Հայաստանից, և՛ Իրանից։ Մեկը 61 կիլոմետր է, մյուսը՝ 43 կիլոմետր։ Սա նույնպես հնարավոր է։ Այսպես թե այնպես մենք դա կանենք Ադրբեջանի հետ միասին։ Չկա մեկը, որը չցանկանա, որ նման միջանցք անցնի իր երկրով։ Պաշտոնապես դա համաձայնեցված չէ։ Ճիշտ է, խնդիր կա, բայց, այնուամենայնիվ, կլուծվի։ Առաջիկա ժամանակահատվածում խնդիրը կլուծվի»,-ասել է թուրք նախարարը։

Օրերս մեկ այլ հարցազրույցում էլ Ուրալօղլուն կրկին  խոսել էր հաղորդակցությունների բացման շուրջ Իրանի ու Հայաստանի դիրքորոշումների մասին։

«Իրանո՞վ, թե՞ Հայաստանով է անցնելու, բանակցությունները վարում է Ադրբեջանը։ Իրանի դեպքում սկզբում բավական առաջընթաց կար, հայկական կողմում էլ զարգացում կա, առաջիկայում պարզ կդառնա»,- հայտարարել  էր Թուրքիայի տրասպորտի նախարարը։

Թարգմանությունը՝ Էմմա Չոբանյանի