Ըստ Լավրովի՝ ԱՊՀ երկրներին հաջողվում է հաղթահարել ՌԴ-ի դեմ պատժամիջոցների հարցում Արևմուտքի ճնշումը

ՌԴ ԱԳ նախարար Սերգեյ Լավրովը հայտարարել է, որ Անկախ պետությունների համագործակցության (ԱՊՀ) երկրները հաջողությամբ հաղթահարում են Արևմուտքի պատժամիջոցների ճնշումը, գրում է «Ինտերֆաքս»-ը։

«Լավ է հաջողվում հաղթահարել։ Միջոցները, որոնք օգտագործում է Արևմուտքը, մյուս բոլոր պետությունների կողմից  մերժում են առաջացնում, այդ թվում՝ հետխորհրդային երկրների»,- ասել է Լավրովը ԱՊՀ երկրների արտգործնախարարների խորհրդի նիստից հետո կայացած մամուլի ասուլիսում՝ պատասխանելով հարցին, թե ինչպես են ԱՊՀ երկրներին հաջողվում դիմակայել Արևմուտքի կողմից հակառուսական պատժամիջոցների կիրառման ճնշմանը։

Նրա խոսքով՝ «անօրինական միջոցները, որոնք կոչվում են երկրորդական, երրորդական պատժամիջոցներ, երբ ինչ-որ մեկին դուր չի գալիս, թե ինչպես են երկու անկախ երկրներ հարաբերություններ կառուցում միմյանց հետ, միջազգային իրավունքի հետ կապ չունեն»։

«Այն բոլոր քայլերը, որոնք մենք ձեռնարկում ենք՝ ապահովելու ոչ միայն մեր առևտրատնտեսական կապերը, նաև դրանց ընդլայնումը՝ դրանց ծավալներն ավելացնելով մեր ռազմավարական գործընկերների և դաշնակիցների հետ, լիովին համապատասխանում են միջազգային իրավունքի նորմերին, որոնք խոսում են արդար մրցակցության, շուկայական մեխանիզմների, սեփականության անձեռնմխելիության մասին»,- ասել է Լավրովը։

Ըստ ռուսաստանցի պաշտոնյայի՝ ԱՊՀ արտգործնախարարների խորհրդի նիստի ընթացքում փաստաթղթեր են ընդունվել միակողմանի հարկադրանքի միջոցների անընդունելիության, ինչպես նաև Եվրասիական անվտանգության համակարգի ձևավորման աշխատանքների հիմնական չափանիշների վերաբերյալ։

Թարգմանությունը՝ Էմմա Չոբանյանի