21.02.2026 | 20:00
Ինչպես է Հայաստանն առաջին անգամ ստացել UWW-ի մրցաշար անցկացնելու հնարավորություն․ զրույց Վլադիմիր Հովհաննիսյանի հետ
Հայտնի են ֆիզիոլոգիայի և բժշկության ոլորտում Նոբելյան մրցանակի դափնեկիրները
Քաղաքականություն
07.10.2024 | 20:22
Ֆիզիոլոգիայի և բժշկության ոլորտում 2024 թվականի Նոբելյան մրցանակը շնորհվել է ամերիկացի գիտնականներ Վիկտոր Ամբրոսին և Գարի Ռավկունին՝ «միկրոՌՆԹ-ների հայտնաբերման և գեների արտահայտման հետտրանսկրիպցիոն կարգավորման մեջ դրանց դերի ուսումնասիրության համար»։ Այս մասին Շվեդիայի մայրաքաղաքում հայտնել է Ստոկհոլմի թագավորական Կարոլինսկա բժշկավիրաբուժական ինստիտուտը, որը շնորհում է մրցանակը, գրում է DW-ի ռուսական ծառայությունը։
Ներկայում այս մրցանակի պարգևավճարը 11 մլն շվեդական կրոն է (շուրջ 900 հազար եվրո)։ Բժշկության ոլորտում Նոբելյան մրցանակը շնորհվել է, ընդհանուր առմամբ, 114 անգամ՝ մինչև 2023 թվականը, և ունի 227 դափնեկիր:
2023 թվականին ֆիզիոլոգիայի և բժշկության ոլորտում Նոբելյան մրցանակը շնորհվել էր Դրյու Վայսմանին և Կատալին Կարիկոյին Փենսիլվանիայի համալսարանից (ԱՄՆ), որոնց աշխատանքը հիմք է հանդիսացել կորոնավիրուսի դեմ պատվաստանյութերի մշակման համար։ Շվեդ կենսաբան Սվանտե Պաաբոն էլ ստացել է բժշկության ոլորտում 2022 թվականի Նոբելյան մրցանակը։
Իսկ ահա 2021 թվականին այս ոլորտում Նոբելյան մրցանակի էին արժանացել ամերիկացի հետազոտողներ Դեյվիդ Ջուլիուսն ու հայազգի Արտեմ Պատապուտյանը։
Թարգմանությունը՝ Էմմա Չոբանյանի
