30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Բորտնիկովը հայտարարել է, թե «ՆԱՏՕ-ն ձգտում է հասնել ՀԱՊԿ-ից ՀՀ-ի դուրս գալուն՝ զենքի արտոնյալ մատակարարումների դիմաց»
Քաղաքականություն
04.10.2024 | 12:15
Արևմուտքը ձգտում է ՆԱՏՕ-ի երկրներից իր «խաղաղապահ զորախումբը մտցնել Անդրկովկաս՝ իբր օգնելու Երևանի և Բաքվի միջև հարաբերությունների կարգավորմանը»: Այս մասին հայտարարել է Ռուսաստանի ԱԴԾ տնօրեն Ալեքսանդր Բորտնիկովը ԱՊՀ անվտանգության մարմիների և հատուկ ծառայությունների ղեկավարների խորհրդի նիստում, գրում է ՏԱՍՍ-ը։
«Ամերիկացիներն ու եվրոպացիներն ակնհայտորեն շահագրգռված չեն Անդրկովկասում կայունության հաստատմամբ։ Երևանին համոզելով հետաձգել Բաքվի հետ բանակցությունները՝ Արևմուտքը փորձում է ղեկավարել ադրբեջանա-հայկական կարգավորման գործընթացը և հասնել տարածաշրջանում իր «խաղաղապահ» կոնտինգենտի տեղակայմանը` դե յուրե ՄԱԿ-ի հովանու ներքո և դե ֆակտո ՆԱՏՕ-ական»,- ասել է նա։
Ռուսաստանցի պաշտոնյան կրկին անդրադարձել է նաև ՀՀ-ում տեղակայված ԵՄ քաղաքացիական դիտորդական առաքելությանը։
«Նման «խաղաղապահության» հնարավոր բնույթի մասին արդեն իսկ մատնանշում է այն փաստը, որ Հայաստանի և Ադրբեջանի սահմանին տեղակայված ԵՄ, այսպես կոչված, անկախ քաղաքացիական դիտորդական առաքելությունը հետախուզական գործունեություն է ծավալում ՆԱՏՕ-ի կոնկրետ երկրի շահերից՝ ընդդեմ Ռուսաստանի ու նրա գործընկերների»,- նշել է Բորտնիկովը։
Նա նաև հայտարարել է, թե «զենքի արտոնյալ մատակարարումների ու անվտանգության երաշխքների դիմաց Արևմուտքը ձգտում է հասնել ՀԱՊԿ-ից Հայաստանի դուրս գալուն, ինչը Երևանին կդնի ավելի մեծ կախվածության մեջ ՆԱՏՕ-ից Բաքվի հետ իր հետագա հարաբերությունների հարցերում»։
«Եվ հաշվի առնելով աշխարհի տարբեր տարածաշրջաններում ՆԱՏՕ-ի միջնորդության նախկին փորձը՝ Անդրկովկասում դաշինքի ամրապնդումն ակնհայտորեն չի նպաստի տարածաշրջանում կայունությանը»,- հայտարարել է Բորտնիկովը։
Թարգմանությունը՝ Էմմա Չոբանյանի
