Թուրքերի ճնշող մեծամասնությունը դժգոհ է ընդդիմությունից. հարցում

Թուրքերի ճնշող մեծամասնությունը՝ 72 տոկոսը, կարծում է, որ երկիրը չունի արդյունավետ ընդդիմություն, ընդ որում, այդ տրամադրությունները հատկապես ուժեղ են երկրի ամենամեծ ընդդիմադիր կուսակցությունների ընտրողների շրջանում։ Այս մասին են վկայում Metropoll ընկերության սեպտեմբերի «Turkey’s Pulse» հետազոտության արդյունքները, որոնք X-ում հրապարակել է ընկերության սեփականատեր, պրոֆեսոր Օզեր Սենջարը։

Մասնակիցներին հարցրել են՝ «Արդյո՞ք կարծում եք, որ Թուրքիայում քաղաքական ընդդիմադիր դաշտում դատարկություն է»: Հարցը Սենջարն անվանել է «ամենահետաքրքիրներից» մեկը սեպտեմբերյան հարցման մեջ:

Արդյունքները ցույց են տվել ընդդիմադիր կուսակցությունների կողմնակիցների դժգոհության ամենաբարձր մակարդակը․ քրդամետ «Ժողովրդական հավասարության և ժողովրդավարության» (DEM կուսակցություն) կողմնակիցների 81,4%-ը, հիմնական ընդդիմադիր Ժողովրդահանրապետական ​​կուսակցության (CHP) ընտրողների 75%-ը և Ազգայնական İYİ (Լավ կուսակցություն) ընտրողների 75%-ը պատասխանել է «այո»։

Միաժամանակ, հարցվածների 23,1 տոկոսը հակառակ կարծիքին է: CHP-ի ընտրողների 21,1 տոկոսը կարծում է, որ նման բաց չկա, այս տրամադրվածությունը կիսում են իշխող «Արդարություն և զարգացում» կուսակցության (AKP) կողմնակիցների 26,2 տոկոսը, նրա ծայրահեղ աջ դաշնակցի՝ «Ազգայնական շարժում» կուսակցության (MHP) ընտրողների 26 տոկոսը, İYİ-ի կողմնակիցների 23,9 տոկոսը։ DEM կուսակցության ընտրողների միայն 14,8 տոկոսն է կարծում, որ ընդդիմադիր դաշտում դատարկություն չկա:

Այս արդյունքները գալիս են CHP-ի առաջնորդ Օզգուր Օզելի հասցեին քննադատությունների ֆոնին՝ Թուրքիայի նախագահ Ռեջեփ Թայիփ Էրդողանի գլխավորած ԱԶԿ-ի կառավարության հետ ենթադրյալ կապերի համար, այդ թվում՝ նրա ենթադրյալ կոռուպցիան քողարկելու համար:

Չնայած նրան, որ CHP-ն առաջինն էր մարտի 31-ի տեղական ընտրություններում, Օզելը, որն անցյալ տարի նոյեմբերին ընտրվել է կուսակցության ղեկավար, չափավոր է ԱԶԿ-ի կառավարությանը քննադատելու հարցում։ Թուրքական քաղաքականության տարբեր հարցերի կարգավորման պատրվակով Օզելն ու Էրդողանը այցելել են միմյանց և խուսափում են կոշտ քննադատությունից, ընդ որում՝ քննադատները Օզելին մեղադրում են Էրդողանին զիջելու, Էրդողանի սահմանած շրջանակում քաղաքականություն վարելու և նախագահի կառավարությանը մարտահրավեր նետող ուժեղ դիմադրությունը ձախողման մեջ:

Թարգմանությունը՝ Էմմա Չոբանյանի