07.10.2026 | 13:05
Կառուցապատողներին հիշեցրել են՝ գնման իրավունքի պայմանագրերում սպառողների իրավունքները խախտող պայմաններ չեն կարող լինել
Էրդողանը ՄԱԿ-ին կոչ է արել ուժ կիրառել, եթե Իսրայելի գործողությունները չդադարեցվեն
Քաղաքականություն
01.10.2024 | 22:14
Թուրքիայի նախագահ Ռեջեփ Թայիփ Էրդողանը հայտարարել է, որ ՄԱԿ-ի Գլխավոր վեհաժողովը պետք է ակտիվացնի ուժի կիրառումը՝ համաձայն 1950 թվականին ընդունված բանաձևի, եթե ՄԱԿ-ի Անվտանգության խորհուրդը չկարողանա կասեցնել Իսրայելի հարձակումները Գազայի հատվածում և Լիբանանում, գրում են թուրքական լրատվամիջոցները։
«ՄԱԿ-ի Գլխավոր վեհաժողովը պետք է արագ իրագործի ուժի կիրառման լիազորությունը, ինչպես դա արել է 1950 թվականին «Միավորվել հանուն խաղաղության» բանաձևի դեպքում, եթե Անվտանգության խորհուրդը չկարողանա անհրաժեշտ կամք դրսևորել»,- ասել է Էրդողանը։
Բանաձևում ասվում է, որ ՄԱԿ-ի Գլխավոր վեհաժողովը կարող է միջամտել, եթե Անվտանգության խորհրդի վետոյի իրավունք ունեցող հինգ մշտական տերությունների՝ Մեծ Բրիտանիայի, Չինաստանի, Ֆրանսիայի, Ռուսաստանի և Միացյալ Նահանգների միջև առկա տարաձայնությունները հանգեցնեն նրան, որ նրանք չկարողանան պահպանել միջազգային խաղաղությունը:
Էրդողանը նաև ասել է՝ տխուր է տեսնել, որ մահմեդական երկրները չեն կարողանում ավելի ակտիվ դիրքորոշում ցուցաբերել Իսրայելի դեմ՝ կոչ անելով նրանց տնտեսական, դիվանագիտական և քաղաքական միջոցներ ձեռնարկել՝ ճնշում գործադրելու Թել Ավիվի նկատմամբ՝ ընդունելու հրադադարը։
«Կոչ ենք անում միջազգային հանրությանն ու իսլամական աշխարհին միջոցներ ձեռնարկել մեր տարածաշրջանում խաղաղություն ապահովելու համար՝ լինեն նրանք մահմեդականներ, հրեաներ, թե քրիստոնյաներ»,- հայտարարել է Թուրքիայի նախագահը։
Թարգմանությունը՝ Էմմա Չոբանյանի
