Ադրբեջանում մարդու իրավունքների վատթարացող իրավիճակը՝ ԵԽԽՎ օրակարգում

Այսօրվանից մեկնարկող Եվրախորհրդի Խորհրդարանական վեհաժողովի աշնանային նստաշրջանում, որը կտևի մինչև հոկտեմբերի 4-ը, Ադրբեջանում մարդու իրավունքների վատթարացող իրավիճակի քննարկում է նախատեսվում։ Նիստի օրակարգի նախագծում ներառված է «հրատապ քննարկման հարց՝ կապված Ադրբեջանում մարդու իրավունքների, օրենքի գերակայության և ժողովրդավարության հետ կապված իրավիճակի վատթարացման հետ»։

Եթե ​​որոշումն ընդունվի, ապա այս հարցի շուրջ քննարկումները տեղի կունենան հոկտեմբերի 3-ին, հայտնում է ադրբեջանական Թուրան գործակալության հատուկ թղթակիցը Ստրասբուրգից։

Քանի որ ԵԽԽՎ-ում ադրբեջանական պատվիրակության լիազորությունները չեն վավերացվել հունվարյան նստաշրջանում, նրա մասնակցությունը Վեհաժողովին դադարեցվել է։

Նստաշրջանում շնորհվելու է նաև Վացլավ Հավելի մրցանակը։ Երեք թեկնածուներից մեկը բանտարկված ադրբեջանցի ակտիվիստ Ակիֆ Գուրբանովն է։ Արարողությանը ելույթ է ունենալու նաև մրցանակի 2022 թվականի դափնեկիր Վլադիմիր Կարա-Մուրզան, որը վերջերս ազատ է արձակվել ռուսական բանտից։ Վեհաժողովում ելույթ են ունենալու Հյուսիսային Մակեդոնիայի արտաքին գործերի նախարար Տիմչո Մուցունսկին և Եվրոպայի խորհրդի նոր գլխավոր քարտուղար Ալեն Բերսետը։ Լիտվայի արտաքին գործերի նախարար Գաբրիելիուս Լանդսբերգիսը՝ որպես Նախարարների կոմիտեի նախագահ, ուղերձ է ներկայացնելու և պատասխանելու է ԵԽԽՎ անդամների հարցերին։

Հիշեցնենք՝ հունվարի 24-ին ԵԽԽՎ-ն քվեարկությամբ որոշել էր չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ է մնացել։

Ի պատասխան՝ Բաքուն վերջերս հայտարարել է, որ ԵԽԽՎ այն անդամներին, որոնք դեմ են քվեարկել ադրբեջանական պատվիրակության լիազորությունների երկարաձգմանը, արգելվում է մուտք գործել Ադրբեջան։

Թարգմանությունը՝ Էմմա Չոբանյանի