Վրաստանի վարչապետի անունը հանվել է Բայդենի՝ համաշխարհային առաջնորդների ընդունելության ցուցակից

ԱՄՆ նախագահ Ջո Բայդենը չեղարկել է Վրաստանի վարչապետ Իրակլի Կոբախիձեի հրավերը սեպտեմբերի 25-ին կայանալիք ընդունելությանը, որտեղ հանդիպում են համաշխարհային առաջնորդները և ՄԱԿ-ի բարձրաստիճան պաշտոնյաները: Տեղեկությունը Civil Georgia-ին հաստատել են Վրաստանի կառավարության վարչակազմից։

Կոբախիձեի գլխավորած վրացական պատվիրակությունը Նյու Յորքում մասնակցում է ՄԱԿ-ի Գլխավոր վեհաժողովի 79-րդ նստաշրջանին։

ՄԱԿ-ի Գլխավոր վեհաժողովի աշնանային նստաշրջանի հետ կապված ավանդական ընդունելությանը Կոբախիձեի հրավերի չեղարկման մասին տեղեկությունն առաջինը տարածել էր «Ամերիկայի ձայն»-ի վրացական ծառայությունը՝ Սպիտակ տան և Կոնգրեսի անանուն աղբյուրներին հղումով։ Ռադիոկայանը, վկայակոչելով Սպիտակ տան աղբյուրին, նշել է, որ «վրացական իշխանությունների վերջին գործողություններն ու հայտարարությունները վկայում են ցնցող անհարգալից վերաբերմունքի մասին ժողովրդավարության և վրաց ժողովրդի կամքի նկատմամբ»։

Լրատվամիջոցը նշում է, որ Բայդենի վարչակազմում որոշումն ընդունվել է այն բանից հետո, երբ Վրաստանի  կառավարության հետ վերջին շփումն ամերիկյան վարչակազմին հույս չի ներշնչել, որ Թբիլիսին կփոխի իր կուրսը։

Վրաստանում ԱՄՆ դեսպան Ռոբին Դաննիգանը վերջերս ասել էր, որ վրացական իշխանությունների հայտարարություններն ու գործողություններն «ավելի են մեկուսացնում Վրաստանն Արևմուտքից»։ Այս հայտարարությանը նախորդել էր դեսպանի և վարչապետ Իրակլի Կոբախիձեի հանդիպումը, որտեղ վերջինը նշել էր, որ «ամերիկյան կողմը հասել է կրիտիկական սահմանագծի» վրաց իրավապահների նկատմամբ պատժամիջոցներ կիրառելու որոշմամբ։

Թարգմանությունը՝ Էմմա Չոբանյանի