22.01.2026 | 23:29
ՀՀ տարածքում կան փակ ավտոճանապարհներ, Լարսը բաց է
Ալիևը հայտարարել է, թե Ադրբեջանում ավելի քան 1000 տեսակի ռազմական արտադրանք է արտադրվում
Քաղաքականություն
24.09.2024 | 22:04
Ադրբեջանի նախագահ Իլհամ Ալիևն այսօր այցելել է Բաքվի էքսպո-կենտրոն, որտեղ մեկնարկել է ADEX-2024 5-րդ միջազգային պաշտպանական ցուցահանդեսը։ Ադրբեջանական լրատվամիջոցների հաղորդմամբ՝ նա նաև ուղերձ է հղել ցուցահանդեսի մասնակիցներին։
«ADEX-ը յուրահատուկ դեր է խաղում բարեկամ և դաշնակից երկրների հայտնի ռազմարդյունաբերական ձեռնարկությունների և արտասահմանյան առաջատար ընկերությունների միջև գործարար կապերի հաստատման գործում։ Այս ցուցահանդեսը լայն հնարավորություններ է ընձեռում ծանոթանալու սպառազինության համաշխարհային շուկայում առկա ժամանակակից պաշտպանական տեխնոլոգիաների և ռազմական տեխնիկայի նորագույն օրինակներին, ինչպես նաև կնքելու նոր պայմանագրեր միջազգային ռազմատեխնիկական համագործակցության ոլորտում։ Միջոցառմանն իրենց արտադրանքը ցուցադրում են հարյուրավոր աշխարհահռչակ ընկերություններ»,- ասել է նա։
Ըստ Ալիևի՝ «հատուկ ուշադրություն է դարձվում Ադրբեջանի պաշտպանունակության ամրապնդման և ազգային անվտանգության ապահովման հարցերին, և այդ ոլորտների հետագա զարգացումն առաջնահերթ ուղղություններից է»։
«Վերջին տարիներին մեր երկրի պաշտպանական արդյունաբերությունը շատ արագ զարգանում է։ Գոյություն ունեցող արտադրական տարածքների ժամանակակից չափանիշներով բարելավումից բացի՝ հաջողությամբ իրականացվում են նոր արտադրական տարածքների ստեղծման աշխատանքներ։ Մեր երկրում արտադրվող տեսականին ավելացել է, և այսօր Ադրբեջանում արտադրվում է ավելի քան 1000 տեսակի ռազմական արտադրանք։ Ե՛վ Ադրբեջանի զինված ուժերը զինված են ժամանակակից զինատեսակներով, և՛ աշխարհի երկրների պաշտպանական արդյունաբերության ընկերությունները սերտորեն հետաքրքրված են մեր արտադրանքով»,- հայտարարել է Ալիևը։
Նա ընդգծել է, թե պաշտպանական արդյունաբերության ոլորտում նոր համագործակցություններ են հաստատվում բարեկամ և դաշնակից բազմաթիվ երկրների հետ, հաջողությամբ շարունակվում են առկա հարաբերությունները։ Ադրբեջանն ընդլայնում է իր ռազմական և տեխնիկական հնարավորությունները՝ հասնելով պաշտպանական արդյունաբերության ոլորտում դինամիկ զարգացման։
Նշենք, որ ADEX-2024 ցուցահանդեսին մասնակցելու համար Ադրբեջան են ժամանել տարբեր երկրների պատվիրակություններ, այդ թվում՝ Ղազախստանի, Իտալիայի ՊՆ ղեկավարները, ինչպես նաև Թուրքիայի ռազմական ղեկավարությունը՝ պաշտպանության նախարար Յաշար Գյուլերի գլխավորությամբ։
Թարգմանությունը՝ Էմմա Չոբանյանի
