11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Թուրքիայում տնտեսական ճգնաժամի պատճառով վերջին 5 տարում երկրից շուրջ 1 մլն մարդ է արտագաղթել
Քաղաքականություն
23.09.2024 | 23:30
Թուրքիայում տնտեսական ճգնաժամին զուգահեռ՝ Գերմանիայում ավելանում է ապաստան հայցող թուրքերի թիվը։ Տեղական լրատվամիջոցները գրում են, որ Թուրքիայից Գերմանիա անօրինական ներգաղթի հոսքը տարեցտարի ավելանում է։ Մինչ թուրքերը գնում են Գերմանիա՝ ավելի լավ կենսապայմանների և ավելի լավ ապագայի համար, Գերմանիան չի ընդունում Թուրքիայի քաղաքացիների 90 տոկոսի ապաստանի հայցերը։ Սակայն թուրքերի մեծ մասին ինչ-որ կերպ հաջողվում է մնալ Գերմանիայում։
Sozcu-ն հայտնում է, որ օրինական ճանապարհով Գերմանիա մեկնած թուրքերի թիվը վերջին երկու տարում հասել է մոտավորապես 130 հազարի։ Եթե սրան գումարվեն ԵՄ անդամ մյուս երկրները, ինչպես նաև ԱՄՆ-ը և Կանադան, ապա վերջին հինգ տարում Թուրքիայում տնտեսական ճգնաժամից փախած թուրքերի թիվը մոտեցել է 1 միլիոնի։
2019 թվականին անօրինական կամ օրինական ճանապարհով Գերմանիա մեկնած և ապաստան հայցած թուրքերի թիվը կազմել է 10 հազար 784։ Այդ տարի, ըստ TURKSTAT (երկրի պետական վիճակագրական ծառայություն) տվյալների, գնաճը կազմել է 11,8 տոկոս։ 2020-ին էլ, չնայած կորոնավիրուսին և ճանապարհորդությունների արգելքին, 5 հազար 778 թուրք գնացել է Գերմանիա և ապաստան խնդրել։ 2020 թվականին երկրում գնաճը կազմել է 12,28 տոկոս։
2021 թվականը կրկին անցել է կորոնավիրուսի հետ կապված արգելքներով։ Չնայած ճանապարհորդության արգելքներին և սահմանափակումներին՝ Թուրքիայից 7,067 մարդ ապաստան է խնդրել Գերմանիայում այն ժամանակահատվածում, երբ գնաճը երկրում հասել է 36 տոկոսի։ Կորոնավիրուսի արգելքների վերացումից հետո թվերը կտրուկ ավելացել են։
2022 թվականին Գերմանիա է մեկնել 25 հազար 54 թուրք։ Նրանց մեծամասնությունն ապօրինի և անօրինական ճանապարհով հասել է Գերմանիա և ապաստան խնդրել։ Մինչդեռ երկրում տարեկան գնաճը կազմել է 64,27 տոկոս։ 2022 թվականին Գերմանիա մեկնած և ապաստան հայցողների 27 տոկոսը ստացել է քաղաքական ապաստան։
TUIK-ի տվյալներով՝ 2023 թվականին Թուրքիայում գնաճը կազմել է 64,77 տոկոս, իսկ Գերմանիա փախած թուրքերի թիվը կտրուկ աճել է։ Անցյալ տարի Գերմանիայում ապաստանել է 62,624 թուրք։ Սիրիացիներից հետո ամենաշատը Գերմանիայում ապաստանած խումբը թուրքերն են։ Նրանց հաջորդում են աֆղանները՝ 53 հազար, և իրաքցիները՝ 12,360։
2023 թվականին ապաստան խնդրած թուրքերի միայն 13 տոկոսի դիմումն է ընդունվել։ Այդ տարի Թուրքիայում գնաճը կրկին կազմել է 65 տոկոս, և չնայած ձեռնարկված միջոցներին, սահմանների փակմանը և շենգենյան հսկողությանը՝ շատ թուրքեր անօրինական մուտք են գործել Գերմանիա։
Այս տարվա առաջին ութ ամիսներին էլ Գերմանիա մեկնած և ապաստան հայցած թուրքերի թիվը կազմել է 21 հազար 590։ Նրանց 9,6 տոկոսի ապաստանի դիմումն ընդունվել է։ Վերջին հինգ տարում Գերմանիա մեկնած և ապաստան հայցած թուրքերի թիվը հասել է 132 հազար 897-ի։ Շուրջ 110 հազար թուրքերի ապաստանի հայցը մերժվել է, և նրանցից շատերինը շարունակում են դիտարկել։
Թարգմանությունը՝ Էմմա Չոբանյանի
