30.04.2026 | 20:13
Գեղամ Գևորգյանը` հեղուկ գազի դեֆիցիտի մասին
Ադրբեջանում քաղբանտարկյալների թիվը հասել է 319-ի․ իրավապաշտպաններ
Քաղաքականություն
23.09.2024 | 22:29
«Ադրբեջանի քաղբանտարկյալների ազատության միությունը» հրապարակել է երկրում քաղբանտարկյալների թարմացված ցուցակը, որում ներառված է 319 մարդ, գրում են ադրբեջանական լրատվամիջոցները։
Ցուցակը կազմել են Խաղաղության և ժողովրդավարության ինստիտուտի տնօրեն Լեյլա Յունուսը և քաղբանտարկյալների մոնիթորինգի կենտրոնի ղեկավար Էլշան Հասանովը։ Նշվում է, որ նախորդ ցուցակի հրապարակումից հետո «հավատացյալներ» կատեգորիայից դուրս է մնացել երկու անձ՝ Ալիկ Ասլանովը և Էլշան Աբբասովը։ Միաժամանակ, ցուցակը համալրվել է 18 նոր քաղբանտարկյալով։
Ցուցակում ներառվել են ընդդիմադիր «Ժողովրդական ճակատ» կուսակցության ակտիվիստ Ռազի Ալիշովը, որը դատապարտվել է թմրանյութերի գործով, երիտասարդ տնտեսագետ Ֆազիլ Գասիմովը, երիտասարդ հետազոտողներ Բահրուզ Սամեդովը և Իգբալ Աբիլովը, ինչպես նաև նախկին դիվանագետ Էմին Իբրահիմովը։ Բացի այդ, ցուցակում ավելացել է ևս 13 հավատացյալի անուն։
Հասանովի խոսքով՝ ցուցակում 319 քաղբանտարկյալները դասակարգված են 10 խմբի։ Հայտնվել են նաև երկու նոր խմբեր։ Վերջերս ձերբակալված Իգբալ Աբիլովից բացի՝ «Ազգային փոքրամասնություններ» խմբում ընդգրկված են թալիշների երկու ներկայացուցիչներ՝ բլոգերներ Ասլան Գուրբանովը և Ռուսլան Վահաբովը, որոնք նախկինում ներառված էին ցուցակում այլ կատեգորիաներում։ Մեկ այլ նոր՝ «Պատերազմին դեմ ակտիվիստներ» խմբում են Բահրուզ Սամեդովը և Էմին Իբրահիմովը։
«Լրագրողներ և բլոգերներ» խմբում ընդգրկված է 18 հոգի, «Իրավապաշտպաններ» խմբում՝ 3, «Ընդդիմադիր կուսակցությունների և հասարակական կազմակերպությունների անդամներ» խմբում՝ 30, «Գերմանիայից արտաքսված քաղաքական էմիգրատներ» խմբում՝ 5, «Տերտերի գործով դատապարտվածների» խմբում՝ 7, «Գյանջայի գործով դատապարտվածների» խմբում՝ 13 մարդ, ևս 11-ը՝ «ցմահ ազատազրկվածների» խմբում։
«Հավատացյալների» խումբը շարունակում է մնալ ամենամեծը․ այստեղ կա 227 քաղբանտարկյալ։
Թարգմանությունը՝ Էմմա Չոբանյանի
