ԱԴԾ-ի ոգին դեռ իշխում է որոշ հայ սահմանապահների աշխատանքային մշակույթում, ինչը չես ասի ոստիկանների մասին․ Ալեքսանդր Լապշին․ ՏԵՍԱՆՅՈՒԹ

Հայտնի բլոգեր Ալեքսանդր Լապշինը Factor TV-ի տաղավարում մանրամասներ է պատմել Երևանի «Զվարթնոց» օդանավակայանում իր հետ տեղի ունեցած միջադեպի մասին։ Նա նշել է, որ Բուլղարիայից է վերադառնալիս եղել կնոջ ու դստեր հետ, ընտանիքի անդամներն անխոչընդոտ անցել են անձնագրային հսկողության 8-րդ կետը։ «Իսկ հետո ես եմ տալիս անձնագիրը, որից հետո սահմանապահը վերցնում է այն ու գնում ինչ-որ տեղ։ Դրանից հետո կանգնել ենք այնտեղ 40 րոպե։ Չէինք կարողանում հասկանալ ինչ է կատարվում։ Վերջին անգամ ինձ հետ նման բան եղել էր Բելառուսում ու վատ ավարտ էր ունեցել։ Ես մոտենում էի տարբեր սահամանպահների, որոնք այլ կետերում էին նստած ու հարցնում՝ ի՞նչ է կատարվում։ Սահմանապահներից մեկին 9-րդ-ում, թե 10-րդում, մոտեցա ու հարցրի՝ հարցումն ումից է՝ ՌԴ-ից, Բելառուսից, Ադրբեջանից, նա ասաց՝ այո։ Դրա համար երբ նա ասաց՝ այո, ես միանգամից գրառում արեցի՝ Ադրբեջանից, Բելառուսից, Ռուսաստանից։ Այն ինչ ինձ ասել էին»,- ասել է Լապշինը։

Այնուհետև բլոգերը պատմել է, որ հայտնվել է սահմանապահ ծառայության մի փոխգնդապետ, որն իրեն ոչ կոմպետենտ է պահել և որը չէր խոսում ո՛չ անգլերեն, ո՛չ ռուսերեն։ «Ձեռքներն էր թափահարում, ասում գնացեք այնտեղ, այստեղ մի կանգնեք, բղավում էր հայերեն, լավ է, որ իմ դուստրը հաճախ է լինում Հայաստանում ու մի քիչ հասկանում է հայերերն։ Նա առաջինը լսել էր ինչպես է այդ փոխգնդապետը մյուս աշխատակցին ասում՝ Լապինշը կալանքի տակ է, նրան պետք է տանել»,-նշել է բլոգերը։ Ըստ նրա՝ փոխգնդապետից պահանջել է ներկայանալ, իսկ նա թաքցրել իր բեյջը։ Նա սպառնացել է, որ իրենց կձերբակալեն։

Լապշինի կարծիքով՝ որոշ սահմանապահներ ԱԴԾ-ի նախկին աշխատակիցներն են ու շարունակում են կապեր ունենալ այդ կառույցի հետ։ «Երբ ինձ 2016թ-ին Արցախ այցելության համար ձերբակալել ու հանձնել էին Ադրբեջանին հիշում եմ՝ ինձ հարցաքննում էր ադրբեջանցի քննիչը՝Քեմալ Թալիբովը, որը բերել էր փաստաթղթեր «Զվարթնոց» օդանավակայանում ու Վրաստանի հետ սահմանի բոլոր մարդկանց մուտքի ու ելքի մասին տվյալներ։ Ինչ վերաբերում է Վրաստանին, գրված էր՝ Վրաստանի գլխավոր դատախազություն։ Ինչպես էին նրանք դա ստացել Երևանից, ինձ դժվար է հասկանալ, Հայաստանը հաստատ նրանց ոչինչ չէր փոխանցել, ռուսական ԱԴԾ-ն էր փոխանցել»,-հայտարարել է բլոգերը՝ նշելով, որ «Զվարթնոց» օդանավակայանում միջադեպից մեկ ժամ անց եկել է ոստիկանությունը, որն «իրեն հիանալի է պահել»․ ««Զվարթնոց»-ի մայորը պարզաբանեց ու ներողություն խնդրեց, նշելով, որ պարտավոր են որոշակի գործընթաց իրականացնել՝  բոլորս միասին հանգիստ կգնանք ոստիկանություն, ոչ ոք չի պատրաստվում Ձեզ ձերբակալել, ձեռնաշղթաներ հագցնել, մենք ադրբեջանցիներ չենք։ Մենք գնացինք, այնտեղ էր ոստիկանության պետը՝ Սերգեյը, որը բացատրեց ինչպես է աշխատում հետախուզման գործընթացը, ներղություն խնդրեց սահմանապահների վարքագծի համար։ Եղել է միջպետական հետախուզում ԱՊՀ մասով Բելառուսի կողմից, ինձ կարդացին  մեղադրանքները»։

Լապշինի կարծիքով «Զվարթնոց» օդանավակայանում իր հետ տեղի ունեցած միջադեպի հետևում կանգնած է ՀՀ-ում Բելառուսի դեսպանը։

«Ո՞վ է այդ ամենը պատվիրել։ Ադրբեջանը չէր կարող ուղիղ դիմել Հայաստանին, դա արվել է Բելառուսով։ Ես նաև ցանկանում եմ նշել Ալեքսանդր Կոնյուկի անունը՝ Հայաստանում Բելառուսի դեսպանի։ Ինչքան գիտեմ հարաբերություններում ճգնաժամի պատճառով նրան կանչել են Մինսկ, իսկ Հայաստանի դեսպանին՝ Երևան։ Այդ դեսպանը, իմ տեղեկություններով, նա է կանգնած այս սադրանքի հետևում։ Նախքան Հայաստանում հայտնվելը, նա եղել է Բելառուսի գլխավոր դատախազը։ Նա է ստորագրել հրամանը ինձ Ադրբեջան արտահանձնելու՝ Արցախ այցելելու համար»,-ասել է Լապշինը՝ նշելով, որ Կոնյուկը ԵՄ-ում և ԱՄՆ-ում անցանկալի անձ է հայտարարված։

Նա անդրադարձել է նաև հարցին, թե ինչու էր լուրեր տարածել, թե իրավապահներից մեկն իրեն ասել է, թե «ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիևի միջև գործարք կա իր հետ կապված»։

«Այդ հարցը երեկ մանրամասն քննարկել ենք ոստիկանությունում։ Մեր շուրջը շատ մարդիկ էին պտտվում՝ սահմանապահներ, անվտանգության աշխատակիցներ, բոլորը ինչ-որ համազգեստով էին։ Ասում էին՝ գնա այստեղ, այնտեղ։ Այդ մարդկանցից մեկը մոտեցավ ինձ ու դա ասաց։ Կարծում եմ՝  նա հումոր էր անում, որը մեղմ ասած, հիմարություն է, վնասակար։ Երևի ենթադրվում էր, որ ես կժպտամ ու ամեն ինչ լավ կլինի։ Ես չեմ կարող նման բաներին հումորով վերաբերյալ, մանավանդ որ, ձերբակալված եմ Բելառուսի դիմումով։ Բոլոր տեղերում, սոցցանցերում սկսեցին գրել է, որ դա պատվեր է»։

Թարգմանությունը՝ Էմմա Չոբանյանի