30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Microsoft-ը հայտարարել է Քամալա Հարիսի դեմ ռուսական ապատեղեկատվության ակտիվացման մասին
Քաղաքականություն
18.09.2024 | 17:23
Ռուսաստանն ակտիվացրել է իր ապատեղեկատվական արշավն ԱՄՆ նախագահի դեմոկրատ թեկնածու Քամալա Հարիսի դեմ։ Այս մասին հայտնում է ծրագրային ապահովման ամերիկյան Microsoft ընկերությունը, փոխանցում է DW-ի ռուսական ծառայությունը։
Ընկերությունը հայտարարել է, որ այն բանից հետո, երբ նախագահ Ջո Բայդենը հրաժարվեց նախընտրական պայքարից, գործընթացի ռուս մասնակիցները որոշակի դժվարություններ են ունեցել վերականգնելու իրենց գործողությունները ԱՄՆ-ում դեմոկրատների դեմ, սակայն օգոստոսի վերջից նրանք սկսել են բովանդակություն արտադրել՝ ուղղված Հարիսին վարկաբեկելուն։ Նշվում է, որ այդ ժամանակից Կրեմլի հետ կապված Storm-1516 խումբը հրապարակել է երկու կեղծ տեսահոլովակ, որոնք քարոզում են Հարիսի և Դեմոկրատական կուսակցության փոխնախագահի թեկնածու Թիմ Ուոլսի մասին «վրդովիչ, հորինված դավադրության տեսություններ»։
Տեսանյութերից մեկում մի խումբ մարդիկ, որոնք ներկայանում են որպես Հարիսի կողմնակիցներ, հարձակվում են հանրապետական թեկնածու Դոնալդ Թրամփի քարոզարշավի ենթադրյալ մասնակցի վրա։ Մեկ այլ տեսանյութում էլ ասվում է, թե 2011 թվականին ԱՄՆ-ի ներկայիս փոխնախագահը, իբր, ճանապարհատրանսպորտային պատահարի պատճառ է դարձել և փախել վթարի վայրից, իսկ վիրավոր 13-ամյա աղջիկը դրանից հետո անդամալույծ է։ Microsoft-ի տվյալներով՝ տուժածի դերը կատարել է դերասանուհի, որը վարձատրվել է նկարահանումներին մասնակցելու համար։
Ըստ ամերիկյան ընկերության՝ երկու տեսանյութերը միլիոնավոր դիտումներ են ունեցել։ Նշվում է նաև, որ Storm-1516 խումբը հայտնի է ապակողմնորոշիչ տեսանյութերի արտադրությամբ, որտեղ դերասանները հանդես են գալիս բացահայտողների կամ լրագրողների դերում ու կեղծ տեղեկություններ տարածում:
Բացի այդ, ըստ Microsoft-ի, Հարիսին վարկաբեկելու և նրա մասին կեղծ տեսանյութեր տարածելու արշավին մասնակցում է ևս մեկ ռուսական խումբ, որը գործում է Storm-1679 անունով։ Այն նախկինում իրականացրել է Փարիզի Օլիմպիական խաղերի մասին կեղծ լուրեր տարածելու օպերացիա, իսկ այժմ անցել է ԱՄՆ ընտրություններին։
Սեպտեմբերի սկզբին Վաշինգտոնը Ռուսաստանին մեղադրել է ԱՄՆ-ում նախընտրական քարոզարշավի ընթացքում հասարակական կարծիքը շահարկելու և մանիպուլացնելու փորձերի մեջ: Այս գործողությունների պատճառով Միացյալ Նահանգները պատժամիջոցներ է սահմանել RT պետական հեռուստաալիքի մի քանի ռուս պրոպագանդիստների, այդ թվում՝ Մարգարիտա Սիմոնյանի նկատմամբ։
Այնուհետև Meta-ն հայտարարել է իր հարթակներում RT-ի և «Россия сегодня»-ի արգելափակման մասին։
Թարգմանությունը՝ Էմմա Չոբանյանի
