Չելյաբինսկում դպրոցականը մուրճով հարձակվել է աշակերտների և ուսուցիչների վրա․ վիրավորներ կան

ՌԴ Չելյաբինսկ քաղաքի թիվ 68 դպրոցում աշակերտը մուրճով հարձակվել է դպրոցականների և ուսուցիչների վրա, հայտնել է Չելյաբինսկի մարզի նահանգապետ Ալեքսեյ Տեքսլերը, գրում է Meduza-ն։

Նա նշել է, որ միջադեպի հետևանքով վիրավորներ կան, որոնք հոսպիտալացվել են։ Տուժածների թիվը նահանգապետը չի հայտնել։

74.ru-ն գրում է, որ հարձակվողը, նախնական տվյալներով, 16 տարեկան է։ Shot տելեգրամ-ալիքի տվյալներով էլ՝ նա 13 տարեկան է։

«Գլխավոր հարցն այն է, թե ինչպես է աշակերտը մուրճը տարել դպրոց: Ինչո՞ւ անվտանգության աշխատակիցները չեն արձագանքել։ Իրավապահ մարմիններին, կրթության նախարարությանը, քաղաքապետարանին, երեխաների իրավունքների հանձնակատարին հանձնարարել եմ մանրամասնորեն պարզաբանել իրավիճակը»,- ​նշել է նահանգապետը։

Տարածաշրջանում երեխաների իրավունքների հանձնակատար Եվգենյա Մայորովան հայտնել է, որ նախնական տվյալներով՝ տուժել է 4 մարդ։ Աղբյուրները հայտնել են, որ աշակերտների վրա հարձակված դեռահասը, բացի մուրճից, ունեցել է դանակ և օդամղիչ ատրճանակ։ Այս տեղեկատվության պաշտոնական հաստատում, սակայն, չկա։

Baza-ի տվյալներով՝ հարձակման ժամանակ վիրավորվել է ուսուցչուհիներից մեկը։ Հիվանդանոցում երեք դպրոցական կա՝ երկու աղջիկ և մեկ տղա։ Տուժածներից մեկը վերակենդանացման բաժանմունքում է, բժիշկները պայքարում են նրա կյանքի համար։

ՌԻԱ Նովոստին հայտնում է, որ  Ռոսգվարդիան ձերբակալել է հարձակվողին։

«Չելյաբինսկի ոստիկանությունը հետաքննություն է անցկացնում քաղաքի Լենինսկի շրջանի դպրոցներից մեկում տեղի ունեցած միջադեպի առնչությամբ։ Ոստիկանության շրջանային վարչության հերթապահ մաս հաղորդագրություն է ստացվել ժամը 9։20-ին (Մոսկվայի ժամանակով 7։20-ին), որ դպրոցի աշակերտը, ծնված 2011թ․, տարբեր առարկաներով մարմնական վնասվածքներ է հասցրել իր հասակակիցներին և ուսուցչուհուն։ Վիրավորների թիվը ճշտվում է։ Դպրոցի անձնակազմը Ռոսգվարդիայի ջոկատ է կանչել, որը ձերբակալել է աշակերտին»,- ասվում է ՆԳՆ հաղորդագրության մեջ։