Թուրքիան Google-ից օգնություն է խնդրել զանգվածային արտահոսքի հետևանքով 108 միլիոն մարդու անձնական տվյալների գողության հետ կապված

Գողացվել են Թուրքիայի պաշտոնական հաստատություններում գրանցված 108 միլիոն մարդու անձնական տվյալները՝ ինչպես երկրի ներսում, այնպես էլ արտասահմանում բնակվող քաղաքացիների, ինչպես նաև փախստականների։ Գողացված տվյալները ներառում են նույնականացման ամբողջական տեղեկություններ, բնակության հասցեները և բջջային հեռախոսահամարները, նշվում է FreeWeb Turkey-ի հաղորդագրության մեջ:

Խախտումը հայտնաբերել է Կիբերմիջադեպերի արձագանքման ազգային կենտրոնը (USOM), որը կապված է Թուրքիայի Տեղեկատվական և հաղորդակցական տեխնոլոգիաների վարչության հետ (BTK): USOM-ը օգնության համար դիմել է Google-ին։

«Մենք իրավական պարտավորություն ունենք պաշտպանելու մեր քաղաքացիներին բոլոր տեսակի կիբերհարձակումներից, ներառյալ՝ ֆիշինգը, հաշիվների գողությունը և տվյալների խախտումները: Այս կապակցությամբ ցանկանում ենք ձեր ուշադրությանը հրավիրել, որ որոշ կարևոր տվյալներ հաջողությամբ վերբեռնվել են ձեր համակարգ»,- ասվում է հայտարարության մեջ։

USOM-ը Google-ին տրամադրել է համապատասխան Drive ֆայլերի հղումներ և խնդրել է դրանք «անհապաղ» հեռացնել «հրատապ» կոդով։ Նրանք նաև խնդրել են Google-ին համագործակցել՝ տրամադրելով օգտատերերի հաշիվների ID-ներ, IP հասցեներ և ֆայլեր վերբեռնած անձանց  համարները։

Հուլիսի և սեպտեմբերի երկու առանձին նամակներում USOM-ն ընդգծել է. «Ձեր արագ արձագանքն այս հարցում չափազանց կարևոր է տուժած օգտատերերի ամբողջականությունն ու անվտանգությունը պաշտպանելու համար»:

Նշվում է, որ Google-ը կատարել է պահանջը և հեռացրել ֆայլերը: Այնուամենայնիվ, մնում է անհասկանալի՝ արդյո՞ք նրանք որևէ տեղեկություն են փոխանցել BTK-ին։

Գողացված տվյալները ներառում են 108 միլիոն մարդու թուրքական նույնականացման համարներ, 82,322,190 մարդու բնակության հասցեներ և 134,817,279 մարդու բջջային հեռախոսահամարներ։