Հասարակություն
04.09.2024 | 11:51
Երևանի քրեական դատարանի դատավոր Վահե Միսակյանի նկատմամբ նոր կարգապահական վարույթ է հարուցել։ Այս մասին տեղեկանում ենք Բարձրագույն դատական խորհրդի կայքից։
Factor․am-ի տեղեկություններով՝ վարույթը կապված է «Հայրենիքի փրկության շարժման» առաջնորդ Վազգեն Մանուկյանի քրեական գործի հետ։ Մանուկյանը մեղադրվում էր իշխանությունը զավթելուն և սահմանադրական կարգը բռնի տապալելուն ուղղված հրապարակային կոչեր հնչեցնելու մեջ։ Դատավոր Միսակյանը, գործը ստանալով 2021 թվականի մարտին, դատավճիռ է հրապարակել 2024-ի հունիսին։ Նա Մանուկյանին մեղավոր է ճանաչել և դապարտել 400 հզ դրամ տուգանքի։
Դատավորի նկատմամբ կարգապահական վարույթ հարուցելու միջնորդությամբ Արդարադատության նախարարությանը դիմել է Գլխավոր Դատախազությունը, և նախարարությունը վարույթ է հարուցել՝ համարելով, որ դատավոր Միսակյանը խախտել է գործի քննության ողջամիտ ժամկետները։
Հիշեցնենք, որ Վահե Միսակյանը եղել է Հայաստանի երրորդ նախագահ Սերժ Սարգսյանի գործով դատավորը, և 2024-ի մայիսի 31-ին արդարացրել է նրան։
Բարձրագույն դատական խորհրդի նախագահ Կարեն Անդրեասյանի խնդրանքով՝ Խորհրդի աշխատակազմը համարվող Դատական դեպարտամենտը ուսումնասիրություն էր կատարել և 2024-ի փետրվարին ֆիլմ հրապարակել Սերժ Սարգսյանի ու այլ հայտնի գործերի ձգձգման պատճառների վերաբերյալ՝ պնդում կատարելով այն մասին, որ Վահե Միսայանը Սերժ Սարգսյանի գործով դատական նիստերի քննության տեմպն արագացրել է ԲԴԽ նոր ղեկավարության ժամանակ՝ 2023 թվականի հունվարից։
Մինչդեռ Factor TV-ն, ուսումնասիրելով ԲԴԽ որոշումներն ու դատավորի վարույթում առկա գործերի քննության տեմպերը, պարզել էր, որ քննության տեմպերի վրա կարող էր ազդել ոչ թե ԲԴԽ-ի` նոր ղեկավար ունենալու գործոնը, այլ այն, որ սկսած 2023 թվականից, դատավորի անունը մի քանի անգամ հանվել է գործերի բաշխման ցանկից, բացի այդ՝ սկսած 2023-ի հունվարից, քրեական գործերով դատավորներն այլևս չէին քննում կալանքի, օպերատիվ հետախուզական միջոցառումներ իրականացնելու միջնորդություններ և մինչդատական վարույթին առնվող այլ գործեր։
Նշենք, որ Միսակյանի վերաբերյալ վարույթն արդեն ուղարկվել է Բարձրագույն դատական խորհուրդ։
Արաքս Մամուլյան
