11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
ՀԱՄԱՍ-ը թանկ կվճարի պատանդների սպանության համար. Նեթանյահու
Քաղաքականություն
03.09.2024 | 18:23
Իսրայելի վարչապետ Բենիամին Նեթանյահուն մտադիր է շարունակել ռազմական գործողությունները Գազայի հատվածում՝ մինչև ՀԱՄԱՍ ահաբեկչական կազմակերպության պարտությունը և զինյալների ձեռքում մնացած իսրայելցի պատանդների ազատ արձակումը։ DW-ի ռուսական ծառայության փոխանցմամբ՝ այս մասին ասված է իսրայելական ռազմական կաբինետի ղեկավարի հայտարարության մեջ, որը նա արել է Ռաֆահ քաղաքի մոտ գտնվող թունելներից մեկում վեց պատանդների դիերի հայտնաբերումից անմիջապես հետո։
Գազայի հատվածի հարավում օգոստոսի 30-ին չորս տղամարդու և երկու կնոջ մնացորդներ են հայտնաբերվել։ Օգոստոսի 31-ին իրականացված դատաբժշկական փորձաքննությունից հետո Իսրայելի Առողջապահության նախարարությունը հայտնել է, որ պատանդները սպանվել են 2-3 օր առաջ՝ «ՀԱՄԱՍ-ի ահաբեկիչների կողմից մոտ տարածությունից արձակված մի քանի կրակոցների հետևանքով»։
Սեպտեմբերի 2-ի ասուլիսում մեկնաբանելով այս ողբերգությունը՝ Նեթանյահուն ներողություն է խնդրել զոհերի հարազատներից այն բանի համար, որ Իսրայելի իշխանությունները չեն կարողացել նրանց ողջ տուն վերադարձնել։
«Մենք մոտ էինք, բայց մեզ չհաջողվեց»,- խոստովանել է նա։
Միաժամանակ, Իսրայելի վարչապետն ընդգծել է, որ ՀԱՄԱՍ-ը թանկ է վճարելու այս հանցագործության համար։
