Վրաստանի ՍԴ-ն սկսել է քննել «օտարերկրյա գործակալների» մասին օրենքի դեմ հայցերը

Վրաստանի Սահմանադրական դատարանը սկսել է չորս հայցերի քննարկումը «Օտարերկրյա ազդեցության թափանցիկության մասին» օրենքը չեղյալ համարելու պահանջով։ Մասնավորապես, դրանք երկրի նախագահի, 122 հասարակական կազմակերպություններից, հետաքննական լրագրության մեջ մասնագիտացած լրատվամիջոցներից և ընդդիմադիր պատգամավորներից բաղկացած խմբի պնդումներն են, փոխանցում է VOA-ն։

Մինչ այդ, «Վրաստանի իրավաբանական ընկերությունների ասոցիացիան» հինգերորդ հայցն է ներկայացրել Սահմանադրական դատարան՝ վիճարկելով վիճահարույց օրենքի սահմանադրականությունը։ Քանի որ այս հայցը դեռևս գրանցված չէ, դատարանն այն կքննարկի առանձին, բայց առանց բանավոր լսումների, մինչդեռ ավելի վաղ բերված չորս հայցերը միավորվել են մեկ վարույթում։

Վրաստանի նախագահ Սալոմե Զուրաբիշվիլին իր պնդումը հիմնավորել է նրանով, որ կառավարությունը խախտել է Սահմանադրության 78-րդ հոդվածը, ըստ որի՝ սահմանադրական մարմիններն իրենց լիազորությունների սահմաններում պարտավոր են ձեռնարկել բոլոր միջոցները՝ ապահովելու երկրի լիարժեք ինտեգրումը ԵՄ-ին և ՆԱՏՕ-ին։

Հիշեցնենք՝ այն բանից հետո, երբ իշխող «Վրացական երազանքն» ընդունեց «օտարերկրյա գործակալների» մասին օրենքը՝ հակառակ արևմտյան գործընկերների նախազգուշացումներին, ԵՄ-ն հայտարարեց Վրաստանի եվրաինտեգրման գործընթացի կասեցման, իսկ ԱՄՆ-ը՝ Վրաստանի հետ հարաբերությունների վերանայման մասին։ Մասնավորապես, ԱՄՆ-ը վիզային սահմանափակումներ է մտցրել վրաց որոշ պաշտոնյաների նկատմամբ, իսկ հուլիսի 31-ին ԱՄՆ պետքարտուղար Էնթոնի Բլինքենը հայտարարեց Վրաստանի կառավարությանն ավելի քան 95 մլն դոլարի ուղղակի օգնությունը կասեցնելու մասին։

Միևնույն ժամանակ, ԱՄՆ նախագահ Ջո Բայդենը ռուս-վրացական պատերազմի 16-րդ տարելիցի կապակցությամբ Վրաստանի նախագահ Սալոմե Զուրաբիշվիլիին հղած նամակում իր հիասթափությունն է հայտնել վրացական իշխանությունների հակաժողովրդավարական գործողությունների և արևմտյան երկրների մասին ապատեղեկատվության տարածման կապակցությամբ։