24.06.2026 | 14:18
Մոսկվան հուսով է՝ ՀՀ-ն կընտրի ԵՏՄ-ն․ Պեսկով
ԿԳՄՍՆ-ն պնդում է, որ ՌԴ-ից պաշտոնական խողովակներով բողոք չի ստացել «Հայոց պատմության» 8-րդ դասարանի դասագրքի վերաբերյալ
29.08.2024 | 19:14
Շուրջ կես ամիս առաջ ՌԴ ԱԳՆ-ն կոչ էր արել ՀՀ իշխանություններին թույլ չտալ «Հայոց պատմություն» 8-րդ դասարանի պատմության դասագիրքը մտցվի հայկական հանրակրթական դպրոցներ։
ՌԴ ԱԳՆ հայտարարությունում նշված էր․ «վիճելի բովանդակությամբ այս դասագրքի գլուխներից մեկում խեղաթյուրված են ներկայացված 18-րդ դարավերջին ու 19-րդ դարասկզբին Հարավային Կովկասում տեղ գտած իրադարձությունները՝ նսեմացնելով ՌԴ-ի դերը»։
Ռուսական կողմի հայտարարությունից հետո Factor.am-ը կապ էր հաստատել ԿԳՄՍՆ հանրակրթության վարչության պետ Թամարա Սարգսյանի հետ, որը մեզ տեղեկացրել էր, որ հանրակրթական դպրոցների «Հայոց պատմություն» 8-րդ դասարանի դասագրքի «Արևելյան Հայաստանի բռնակցումը Ռուսաստանին» գլուխն արդեն փոփոխվել է և նոր տարբերակով դրվել է շրջանառության։
Նա նշել էր, որ դասագրքի «Արևելյան Հայաստանի բռնակցումը Ռուսաստանին» գլխի վերաբերյալ տարբեր ահազանգեր են ստացել, նախարարությունն էլ դիմել է գրքի հեղինակներին՝ այն վերանայելու։
Սակայն, հանրակրթության վարչություն պետն այդպես էլ չէր հստակեցրել, թե իրենք ռուսական կողմից ահազանգ ստանալուց հետո են դասագրքում խմբագրումներ արել, թե՝ ոչ։
ԿԳՄՍՆ-ից փորձել ենք պարզել՝ արդյո՞ք ՌԴ-ից պաշտոնական գրություն ստացել են «Հայոց պատմություն» 8-րդ դասարանի դասագրքի «Արևելյան Հայաստանի բռնակցումը Ռուսաստանին» գլխի վերաբերյալ և արդյո՞ք ռուսական կողմից ահազանգից հետո է «բռնակցում» բառը հանվել։
Ի պատասխան ԿԳՄՍ նախարարի տեղակալ Արաքսիա Սվաջյանը հայտնել է, որ մեր կողմից բարձրացված երկու հարցերի պատասխաններն էլ բացասական են։
Նախարարության պատասխանից ստացվում է, որ, ըստ էության, ՌԴ-ն իրենց պաշտոնապես բողոքի նոտա չի հղել «Հայոց պատմության» 8-րդ դասարանի դասագրքի «Արևելյան Հայաստանի բռնակցումը Ռուսաստանին» գլուխը փոփոխելու վերաբերյալ, բայց փոփոխություն են արել հայաստանյան մասնագետների դիտողություններից հետո։
Մանյա Պողոսյան
