22.04.2026 | 16:07
Մինչ այս պահը 3 կուսակցություն է ընտրություններին մասնակցելու փաստաթուղթ ներկայացրել. ԿԸՀ խոսնակ․ ՏԵՍԱՆՅՈՒԹ
«Արևելյան Հայաստանի բռնակցումը Ռուսաստանին» գլուխը դասագրքում փոփոխվել է․ ԿԳՄՍՆ հանրակրության վարչության պետ
Հասարակություն
16.08.2024 | 12:03
Հանրակրթական դպրոցների «Հայոց պատմության» 8-րդ դասարանի դասագրքի «Արևելյան Հայաստանի բռնակցումը Ռուսաստանին» գլուխը փոփոխվել է և նոր տարբերակով դրվել է շրջանառության, այս մասին Factor.am-ի հետ զրույցում հայտնեց ԿԳՄՍՆ հանրակրթության վարչության պետ Թամարա Սարգսյանն։ Նրա խոսքով՝ դասագրքի «Արևելյան Հայաստանի բռնակցումը Ռուսաստանին» գլխի վերաբերյալ տարբեր ահազանգեր են ստացել, նախարարությունն էլ դիմել է գրքի հեղինակներին՝ այն վերանայելու։
«Դասագիրքը «Դասագրքերի և տեղեկատվական հաղորդակցական տեխնոլոգիաների շրջանառու հիմնադրամ»-ի կողմից երաշխավորվելուց հետո, ըստ ընթացակարգի, տեղադրվեց կայքում, մենք ունեցանք ահազանգեր այն մասով, որ գլուխներից մեկը, որը վերնագրված է «Արևելյան Հայաստանի բռնակցումը Ռուսաստանին» իր մեջ որոշակիորեն բացասական երանգ է պարունակում հայ-ռուսական հարաբերությունների, Ռուսաստանի դերի տեսանկյունից։ Տաբեր ահազանգեր են ստացել, այդ թվում՝ տարբեր գործընկերների կողմից։ Մենք հեղինակների հետ կապ հաստատեցինք և առաջարկեցինք վերանայել այդ վերնագիրը և այնպիսի մոտեցում ցույց տալ, ինչպիսին ներկայացված է հայոց պատմության առարկայական չափորոշիչներում։ Հեղինակային խումբն աշախատել է, վերնագրում համապատասխան փոփոխություններ են արվել, որը մեր կողմից ընդունվել է և ուղարկվել հիմնադրամ»,- մանրամասնեց Թամարա Սարգսյանը։
Հիշեցնենք՝ ՌԴ ԱԳՆ-ն երեկ կոչ է արել ՀՀ իշխանություններին թույլ չտալ 8-րդ դասարանի պատմության դասագիրքը մտցվի հայկական հանրակրթական դպրոցներ։
ՌԴ ԱԳՆ հայտարարությունում նշված է, որ «վիճելի բովանդակությամբ այս դասագրքի գլուխներից մեկում խեղաթյուրված են ներկայացված 18-րդ դարավերջին ու 19-րդ դարասկզբին Հարավային Կովկասում տեղ գտած իրադարձությունները՝ նսեմացնելով ՌԴ-ի դերը»։
Մասնավորապես, ըստ ՌԴ ԱԳՆ-ի, պատմության դասագրքում վերաձևակերպվել են 1826-1828 թվականների ռուս-պարսկական պատերազմի արդյունքների գնահատականները։
Մանյա Պողոսյան
