Սուրճ ներկրող ընկերությունը կազատվի մաքսատուրքից

«Ռոյալ Արմենիա» ընկերությունը կազատվի մաքսատուրքից։ Սուրճ ներկրող ընկերությունը կազատվի 336․5 մլն դրամ արտանությունից, իսկ արտոնություն ստանալու համար ներկայացված ապրանքների արժեքը կազմում է 3․5 մլրդ դրամ։ Որոշումը ներառված է ՀՀ Կառավարության վաղվա նիստի օրակարգում՝ չզեկուցվող հարցերի շարքում։

Ըստ հիմնավորման՝ ծրագրի շրջանակում նախատեսվում է իրականացնել 400 մլն դրամի կապիտալ ներդրում (սարքավորումներ և շինարարական աշխատանքներ), ևս 3․5 մլրդ դրամի ներդրում՝ հումքի ձեռքբերման համար։
Ընկերությունում 165 աշխատատեղ կա՝ 520 հազար դրամ միջին ամսական աշխատավարձով։ Ներդրումային ծրագրի շրջանակում մինչև 2027 թվականը նախատեսվում է աշխատատեղերի թիվը հասցնել 200-ի՝ 600 հազար դրամ միջին ամսական աշխատավարձով։

Ըստ իրավաբանական անձանց պետական ռեգիստրի (e-register)՝ ընկերության իրական շահառուներից է Գագիկ Հակոբյանը, մյուսը՝ Դավիդ Գագուիկովիչ Ակոպյան Ալուջասը՝ 48.37% մասնակցությամբ, հաջորդը՝ Ռուբեն Ակոփյան Ալուջասը՝ 48.37% մասնակցությամբ։ Վերջինը Կուբայի քաղաքացի է։

Հարկ է նկատել, որ ուշագրավ պատմություն կա՝ կապված ընկերության տնօրեն Գագիկ Հակոբյանի հետ։ Հակոբյանն ու նրա տեղակալ Արամ Ղազարյանը 2005 թվականի հոկտեմբերին ձերբակալվել էին, երբ Հայաստանի մաքսային ծառայությունը նրանց մեղադրեց մաքսանենգության, հարկերից խուսափելու, փաստաթղթեր կեղծելու մեջ։
1 տարի 9 ամիս Ազգային անվտանգության ծառայության մեկուսարանում անցկացնելուց հետո, սակայն, նրանք ազատ արձակվեցին դատարանի դահլիճից:

Մանյա Պողոսյան