Տհաճ ժեստ․ Բաքվում անհանգստացած են Ադրբեջանի սահմանների մոտ Իրանի ռազմածովային ուժերի զորավարժությունների կապակցությամբ

Իրանը զորավարժություններ է անցկացրել Ադրբեջանին սահմանակից հյուսիսային տարածքում։ Այս մասին օգոստոսի 13-ին հայտնել է Mehr գործակալությունը։ Աղբյուրը, վկայակոչելով տեղի պաշտոնյային, նշում է, որ զորավարժությունների նպատակը բանակի ռազմածովային ուժերի պաշտպանունակության ամրապնդումն է։

Այս զորավարժությունները տեղի են ունենում Իսրայելի դեմ հակաքայլեր ձեռնարկելու՝ Թեհրանի հայտարարությունների ֆոնին։ Ընդ որում, սա Իրանի երկրորդ զորավարժությունն է վերջին 3-4 օրվա ընթացքում։

Նախորդ տարիներին Ադրբեջանի հետ սահմանի երկայնքով Իրանի զորավարժությունները Բաքվում արժանացել են քննադատությունների՝ թե՛ նախագահի, թե՛ Ազգային ժողովի որոշ պատգամավորների մակարդակով։ Ոմանք այն նույնիսկ ընկալել են որպես սպառնալիք Ադրբեջանի համար։ Ի պատասխան՝ Ադրբեջանը Թուրքիայի հետ զորավարժություններ է անցկացրել նաև երկրի հարավում՝ Իրանի հետ սահմանի մոտ։

Ադրբեջանի ԱԳՆ-ն դեռևս չի մեկնաբանել այն հարցը՝ արդյո՞ք այս զորավարժությունները համակարգվել են հարևան Ադրբեջանի հետ, և եթե ոչ, ապա դրանք վտա՞նգ են ներկայացնում Ադրբեջանի համար։ Նախարարությունից նշել են, որ հայտարարություն կտարածվի, եթե որևէ տեղեկություն հասանելի դառնա հրապարակման համար:

«Ատլաս» հետազոտական կենտրոնի ղեկավար Էլխան Շահինօղլուն «Ազադլըգ» ռադիոկայանին ասել է, որ Թեհրանում ՀԱՄԱՍ-ի առաջնորդի սպանությունից հետո Իրանում կրկին հնչել են պահպանողականների կոչերը։

«Նոր նախագահ Մասուդ Փեզեշքիանը նույնպես ստիպված է համաձայնել նրանց կոչերին: Նա նույնիսկ ասել է, որ եթե Իրանը չկարողանա ուղղակիորեն հարվածել Իսրայելին, ապա պետք է հարվածի տարածաշրջանում նրա գործընկերների կենտրոններին»,- ասել է նա։

Ըստ Շահինօղլուի՝ Ադրբեջանի հետ սահմանի մոտ զորավարժություններ անցկացնելը տհաճ ժեստ է։

«Երբ Ադրբեջանի տարածքներն օկուպացված էին, Իրանը երբեք զորավարժություններ չի անցկացրել [Ադրբեջանի հետ սահմանի մոտ]: Սակայն 2020 թվականից Իրանը մի քանի զորավարժություն է անցկացրել մեր սահմանների մոտ։ Հիմա սպառնում են ու փորձում են ահաբեկել Ադրբեջանին»,- շեշտել է նա։