Քաղաքականություն
13.08.2024 | 17:52
Ռուսաստանի իշխանությունները հետևում են Պաղեստինում տեղի ունեցող իրադարձություններին՝ չնայած Ուկրաինայի դեմ պատերազմին։ Այս մասին հայտարարել է ՌԴ նախագահ Վլադիմիր Պուտինը Պաղեստինի առաջնորդ Մահմուդ Աբասի հետ բանակցություններում, գրում է The Moscow Times-ը։
«Բոլորը քաջ գիտակցում են, որ Ռուսաստանն այսօր, ցավոք, պետք է պաշտպանի իր շահերը, պաշտպանի իր ժողովրդին զենքը ձեռքին, բայց այն, ինչ կատարվում է Մերձավոր Արևելքում, այն, ինչ կատարվում է Պաղեստինում, իհարկե, աննկատ չի մնում մեր կողմից»,- նշել է Պուտինը։
Նա ընդգծել է, որ Ռուսաստանը միշտ հանդես է եկել պաղեստինա-իսրայելական հակամարտության խաղաղ կարգավորման օգտին։
«Մենք կարծում ենք, որ տարածաշրջանում երկարաժամկետ, հուսալի, կայուն խաղաղություն ապահովելու համար անհրաժեշտ է իրականացնել ՄԱԿ-ի բոլոր որոշումները և, առաջին հերթին, ստեղծել լիարժեք պաղեստինյան պետություն»,- ասել է Պուտինը։
Հիշեցնենք՝ 2023 թվականի հոկտեմբերի 7-ին պաղեստինյան ՀԱՄԱՍ շարժումը հարձակվեց Իսրայելի վրա՝ սպանելով ավելի քան 1 հազար մարդու։ Ի պատասխան՝ Թել Ավիվը ռազմական գործողություն սկսեց Գազայի հատվածում ՀԱՄԱՍ-ի դեմ։ Օգոստոսի 12-ի դրությամբ՝ տարածաշրջանում զոհվել է գրեթե 40 հազար խաղաղ բնակիչ, ևս 92 հազարը վիրավորվել է։
Մինչ այդ, Ռուսաստանը լայնամասշտաբ պատերազմ է մղում Ուկրաինայի դեմ 2022 թվականի փետրվարի 24-ից։ Ընթացիկ տարվա օգոստոսի 6-ին Ուկրաինայի Զինված ուժերն առաջին անգամ ռազմական գործողությունները տեղափոխեցին Ռուսաստանի տարածք՝ ներխուժելով Կուրսկի շրջան։ Պատերազմի ուսումնասիրության ամերիկյան ինստիտուտի (ISW) տվյալներով՝ մեկ շաբաթվա մարտերի ընթացքում՝ օգոստոսի 6-ից 12-ը, ուկրաինական բանակը գրավել է մոտ 800 քառ. կմ Ռուսաստանի տարածքից։ Ուկրաինական Deep State նախագիծը հայտնել է, որ Ուկրաինայի զինված ուժերը կարողացել են գրավել 44 բնակավայր։ Financial Times-ը ուկրաինական ուժերի առաջխաղացումը Ռուսաստանի տարածքի խորքում գնահատել է մոտ 30 կմ:
Միաժամանակ, Կուրսկի շրջանի նահանգապետի պաշտոնակատար Ալեքսեյ Սմիրնովը Պուտինին զեկուցել է, որ օգոստոսի 12-ի դրությամբ՝ ուկրաինական ուժերի վերահսկողության տակ է գտնվում 28 բնակավայր, որտեղ մնացել է 2 հազար մարդ։
