09.09.2026 | 14:56
«Սուտ եք խոսում, Տավուշից Ադրբեջանին գյուղ չի հանձնվել»․ բանավեճ՝ Ղալումյանի և Ղազարյանի միջև․ ՏԵՍԱՆՅՈւԹ
Ուկրաինայի տարածքով ռուսական գազի տարանցումը նվազել է Կուրսկում մարտերի ֆոնին
Քաղաքականություն
08.08.2024 | 17:57
Ռուսական գազի տարանցումն ուկրաինական գազափոխադրման համակարգով օգոստոսի 8-ին նվազել է՝ հասնելով 37,25 միլիոն խորանարդ մետրի։ Այս մասին հայտնում է «Экономическая правда»-ն՝ վկայակոչելով Ուկրաինայի գազատրանսպորտային համակարգի տվյալները «Սուջա» մուտքի կետում, գրում է BBC-ի ռուսական ծառայությունը։
Այժմ Սուջան միակ կետն է, որով ռուսական գազը մտնում է Ուկրաինա՝ եվրոպացի բաժանորդներին հասցնելու համար։
Օգոստոսի 6-ից Կուրսկի շրջանում մարտերը շարունակվում են Ուկրանայի ԶՈւ-ի և ռուսական բանակի միջև։ Տելեգրամյան ալիքներում չհաստատված տեղեկություններ են հայտնվել այն մասին, որ ուկրաինական զինված ուժերը վերահսկողության տակ են վերցրել «Սուջա» գազային կայանը։
Սովորաբար Ուկրաինայի տարածքով ռուսական գազի տարանցման ծավալը կազմում էր օրական մոտ 42-42,4 մլն խմ։
Նախորդ օրվա համեմատ՝ տարանցման ծավալները նվազել են 6 տոկոսով։ Սա տարանցման ամենացածր ցուցանիշն է 2023 թվականի մայիսի 1-ից ի վեր: Տարանցման կրճատման պատճառներն առայժմ անհայտ են: Նախօրեին ուկրաինական օպերատորը հայտնել էր, որ ռուսական գազի տարանցումն ընթանում է բնականոն հունով։
Կուրսկի տարածաշրջանում տեղի ունեցող իրադարձությունների ֆոնին Եվրոպայում բնական գազի գներն աճել են 5,7 տոկոսով՝ հասնելով ամենաբարձր արժեքին 2023 թվականի դեկտեմբերից ի վեր։
