Կուրսկի շրջանում երրորդ օրն է՝ մարտերը շարունակվում են․ տեղի իշխանությունները հայտարարել են խոցված հրթիռների և ԱԹՍ-ների մասին

Կուրսկի շրջանում արդեն երրորդ օրն է՝ մարտերը շարունակվում են։ Օգոստոսի 8-ի առավոտյան շրջանի ղեկավարի պաշտոնակատար Ալեքսեյ Սմիրնովը հայտնել է, որ հակաօդային պաշտպանության համակարգերը 7 հրթիռ և վեց անօդաչու թռչող սարք են խոցել տարածաշրջանում։ Մեկ ժամ առաջ Կուրսկի շրջանում հրթիռային սպառնալիք էր հայտարարվել։ Գիշերվա ընթացքում մի քանի անգամ հրթիռային տագնապ է հայտարարվել, փոխանցում է Current Time-ը:

ՌԴ ՊՆ-ն պնդում է, որ օգոստոսի 8-ի գիշերը և առավոտյան հակաօդային պաշտպանության համակարգերը Կուրսկի շրջանում ոչնչացրել են վեց անօդաչու թռչող սարք և հինգ հրթիռ։ Եվս 14 անօդաչու թռչող սարք, ըստ գերատեսչության, խոցվել է Բելգորոդի շրջանում։

Պատերազմի ուսումնասիրության ամերիկյան ինստիտուտի (ISW) վերջին զեկույցում նշվում է, որ տարբեր աղբյուրների համաձայն՝ ուկրաինական զորքերը կարող են արդեն 10 կիլոմետր առաջ շարժված լինել դեպի Կուրսկի շրջան։

Ըստ «Ռիբար»-ի՝ ուկրաինացի զինվորականները գրավել են Սուջայի արևմտյան հատվածը և այս պահին մարտական շփման գիծն անցնում է ամբարտակի տարածքով (սա հարթավայր է, որով հոսում է Սուջա փոքր գետը):

Նշվում է, որ ռուսական կողմից այս տարածքը պաշտպանում են հիմնականում «տեղի աշխարհազորայինների ստորաբաժանումները»։

Տելեգրամ-ալիքը նաև պնդում է, որ ներկայում «ուկրաինական կազմավորումների թվաքանակը, ռազմական տեխնիկայի պաշարներն ու հակառակորդի ռազմական պոտենցիալը սպառված չեն»։ Ռուսական «Դվա մայորա» Տելեգրամ-ալիքն էլ նշում է, որ «իրավիճակը բարդ է», և հակառակորդն «ավելի մեծ ուժեր է օգտագործում, քան նախկինում ենթադրվում էր»։