07.10.2026 | 15:44
ԱՄՆ-ում մահապատժի ընթացքում ողջ մնացած կինը գիտակցության է եկել
Wildberries-ն իր դոմենների գրանցման իրավունքը փոխանցել է Միրզոյան եղբայրներին․ Կադիրովը ռեյդերային գրավման մասին է խոսել. The Moscow Times
Քաղաքականություն
30.07.2024 | 17:38
Wildberries ընկերությունն իր դոմենների գրանցման իրավունքները փոխանցել է Russ առցանց գովազդային օպերատորի հետ ստեղծված նոր համատեղ ձեռնարկությանը, որի հետ գործարքի մասին հայտնի է դարձել հունիսին։ Իրավիճակին ուշադրություն է հրավիրել DNS թվային և կենցաղային տեխնիկայի առցանց խանութի համահիմնադիր և համասեփականատեր Դմիտրի Ալեքսեևը, գրում է The Moscow Times-ը։
«Դե ինչ, արդեն ամեն ինչ շատ վատ է։ Wildberries-ի կայքերի գրանցումը նույնպես փոխանցվել է РВБ-ին։ Այժմ Wildberries LLC-ն ունի միայն ապրանքային նշանների իրավունք»,- գրել է Ալեքսեևը Telegram-ի իր ալիքում։
Ալեքսեևը Wildberries-ի միաձուլումը Russ-ի հետ, որի մասին հայտարարվել է 2024 թվականի հունիսին, անվանել է «զարմանալի» և «աննախադեպ» գործարք՝ հավելելով, որ որպես մարդ, որն «ինչ-որ չափով գլուխ է հանում կորպորատիվ կառավարումից և շուկայից», ենթադրում է, որ գործարքի արդյունքում Wildberries-ի հիմնադիր Տատյանա Բակալչուկը ոչ միայն «կնվիրի» բիզնեսի 35%-ը, այլև «կարող է ամբողջությամբ կորցնել վերահսկողությունն» ընկերության նկատմամբ:
Wildberries-ի և Russ-ի միաձուլման շուրջ խնդիրների մասին հայտնի դարձավ անցյալ շաբաթ Չեչնիայի ղեկավար Ռամզան Կադիրովի միջոցով։ Նա իր Telegram ալիքում հայտնել է, որ Բակալչուկի ամուսինը՝ Վլադիսլավը, եկել է իր մոտ և խոսել իր ընտանիքում ու բիզնեսում առկա լուրջ խնդիրների մասին։ Ըստ Կադիրովի՝ Բակալչուկն ասել է, թե ռեյդերներն իր կնոջն ու երեխաներին «հեռացրել են» իրենից, իսկ Wildberries-ի ակտիվներն «իրավական մեքենայությունների միջոցով հապճեպ անցնում են օտար ձեռքեր Russ Outdoor ընկերության միջոցով»:
«Առկա է բացահայտ և լկտի ռեյդերական գրավում: Ես գիտեմ, որ այս ռեյդերային գործընթացի լծակները գտնվում են Լևան և Ռոբերտ Միրզոյան եղբայրների, ինչպես նաև մի քանի հայտնի կովկասցիների ձեռքում»,- գրել է Կադիրովը։
Ռոբերտ Միրզոյանը գլխավորում է արտաքին գովազդի Russ Outdoor օպերատորը, որի հետ Wildberries-ը հունիսին հայտարարեց միաձուլման մասին։ Նրա մասին քիչ բան է հայտնի, իսկ եղբոր՝ Լևանի մասին՝ շատ ավելի քիչ։ Շուկայի մասնակիցները Russ Outdoor-ը կապում են շատ ավելի հայտնի կովկասցի՝ միլիարդատեր Սուլեյման Քերիմովի հետ:
Բակալչուկը հորինվածք է անվանել իր ամուսնու վարկածը ռեյդերային գրավման մասին: Ըստ նրա՝ «սա ռեյդերային գրավում չէ, այլ ամուսնալուծություն»։
Wildberries-ի հիմնադիրն ասել է՝ իրեն ոչ ոք չի առևանգել, ինքն ու իր երեխաները լավ են. «Ես ողջ եմ և առողջ, ես պատանդ չեմ՝ Կովկասի գերուհի չեմ»:
Ընկերության հիմնական սեփականատերը Տատյանա Բակալչուկն է՝ 99 տոկոս բաժնետոմսով, նրա ամուսինը 1 տոկոս բաժնեմաս ունին։ Բայց ամուսինների միջև ամուսնական պայմանագիր չկա, այս դեպքում ամուսնալուծության ժամանակ գույքը հավասարապես պետք է բաժանվի իրենց միջև, պնդում է Վլադիսլավ Բակալչուկը։
