ՌԴ Քննչական կոմիտեն առաջարկել է խստացնել միգրացիայի մասին օրենսդրությունը

Ռուսաստանի Քննչական կոմիտեն Պետդումա է ուղարկել «միգրացիոն ոլորտում հանցագործությունների դեմ պայքարի և միգրացիոն քաղաքականության բարելավման առաջարկներ»։ Այս մասին ասվում է գերատեսչության պաշտոնական Telegram ալիքում։ Նշվում է, որ առաջարկները պատրաստվել են ՌԴ Քննչական կոմիտեի ղեկավար Ալեքսանդր Բաստրիկինի անունից, փոխանցում է DW-ի ռուսական ծառայությունը։

Քննչական կոմիտեն առաջարկել է «ավելի խստորեն կարգավորել հպատակագրված քաղաքացիների քաղաքացիությունից զրկելու հարցը»՝ ավելացնելով այն չեղարկելու նոր հիմքեր։

Մասնավորապես, առաջարկվում է բռնագրավել Ռուսաստանի Դաշնության անձնագիրը «դիտավորությամբ ծանր կամ առանձնապես ծանր հանցագործություն նախապատրաստելու, փորձելու կամ կատարելու համար»։ Քննչական կոմիտեն նաև առաջարկել է հանցագործություն կատարելիս ՌԴ տարածքում ապօրինի ներկայությունը ճանաչել որպես ծանրացուցիչ հանգամանք։

Առաջարկվում են նաև մի շարք միջոցառումներ, որոնք կնպաստեն երկիր ժամանող և լքող օտարերկրացիների նկատմամբ վերահսկողության խստացմանը, ասվում է զեկույցում։

Պոտենցիալ միջոցառումների թվում Քննչական կոմիտեն դիտարկում է կենսաչափական, մատնահետքերի, գենոմի գրանցման, աշխատանքի և բնակության վայրի թվային գրանցման, ինչպես նաև օտարերկրացիներին, այսպես կոչված, «ռեզինե բնակարաններում» զանգվածային հաշվառման արգելքի ընթացակարգերը։

«Ռուսաստանի քաղաքացիություն ձեռք բերողների համար կարևոր է զուգորդել ռուսական անձնագիր ստանալու ընթացակարգը միաժամանակյա զինվորական հաշվառման հետ»,- հավելել են Քննչական կոմիտեից։

Զեկույցում նշվում է նաև, որ վարչությունը «առաջարկություններ է արել, որոնք որոշակի պարտականություններ են դնում գործատուների վրա», որոնք աշխատանքի են ընդունում օտարերկրացիներին: Թե կոնկրետ ինչ առաջարկների մասին է խոսքը, չի նշվում։