01.05.2026 | 12:24
Ադրբեջանի Մեջլիսը դադարեցնում է համագործակցությունը Եվրախորհրդարանի հետ
Թուրքիայի ԱԳՆ և ՊՆ ղեկավարներն այցելել են Նիգեր՝ զարգացնելու ռազմական ու տնտեսական համագործակցությունը
Քաղաքականություն
18.07.2024 | 22:37
Թուրքիայի պատվիրակությունն այցելել է Նիգեր՝ ձգտելով ամրապնդել ռազմական համագործակցությունը շուրջ մեկ տարի առաջ հեղաշրջման արդյունքում իշխանության եկած ռեժիմի հետ, գրում են թուրքական լրատվամիջոցները։
Նիգերը ղեկավարվում է ռազմական ռեժիմի կողմից 2023 թվականի հուլիսյան հեղաշրջումից հետո, որը պաշտոնանկ է արել նախագահ Մուհամեդ Բազումին․ նա մինչ օրս բանտարկված է։ Խունտան՝ գեներալ Աբդուրահմանե Թիանիի գլխավորությամբ, երես է թեքել արևմտյան նախկին դաշնակիցներից, ինչպիսիք են Ֆրանսիան ու ԱՄՆ-ը, և անցել Թուրքիայի և Ռուսաստանի կողմը:
Թիանին ընդունել է թուրքական պատվիրակությանը, որի կազմում են եղել Թուրքիայի ԱԳ նախարար Հաքան Ֆիդանը, պաշտպանության նախարար Յաշար Գյուլերը, էներգետիկայի ու բնական ռեսուրսների նախարար Ալփարսլան Բայրաքթարը, Ազգային հետախուզական ծառայության ղեկավար Իբրահիմ Քալընը, նախագահին կից պաշտպանական արդյունաբերության կոմիտեի ղեկավար ալուք Գյորգյունը , առևտրի նախարարի տեղակալ Օզգյուր Վոլկան Աղարը։
Ամփոփելով այցն ու տեղի ունեցած տարբեր հանդիպումները՝ Ֆիդանը լրագրողների հետ զրույցում հայտարարել է, որ Թուրքիայի նախագահ Ռեջեփ Թայիփ Էրդողանն առաջ է քաշել երկկողմ հարաբերությունները ռազմավարական հեռանկարի հասցնելու գաղափարը, և այդ ուղղությամբ Նիգեր կատարած այցի ընթացքում իրենք հնարավորություն են ունեցել բազմաթիվ հարցեր քննարկել իրենց զրուցակիցների հետ։
Թուրքիան և Նիգերը ստորագրել են նավթի և բնական գազի ոլորտում համագործակցության մտադրության արձանագրություն։ Հռչակագրի ստորագրմամբ նախատեսվում է ընդլայնել երկխոսությունը երկու երկրների համապատասխան կառույցների և ընկերությունների միջև։ Այս համատեքստում նպատակն է աջակցել և խրախուսել թուրքական ընկերություններին Նիգերում նավթի և բնական գազի հանքավայրերի մշակման ու արդյունահանման գործում։
Էմմա Չոբանյան
