Այն, ինչ տանն անգամ ամոթ է արտաբերել, մարդիկ իրար գրում են համացանցում. շատ եմ տխրում. Նարինե Գրիգորյան․ ՏԵՍԱՆՅՈՒԹ

«Մեր այս դժվարին ժամանակներում անհրաժեշտ է, որ իրար տեր կանգնենք, պետք է հասկանանք, որ նույն կաթսայի մեջ ենք, կարևոր է իրար կողքի լինելը, հետո՞ ինչ, որ հակառակ ենք մտածում: Ունեմ շատ լավ ընկերներ, որոնց հետ հակառակ բևեռներում ենք, հակառակ կարծիքներ ունենք, բայց դա մեզ չի խանգարում»,- Factor TV-ի հետ զրույցում նշում է Համազգային պետական թատրոնի գեղարվեստական ղեկավար Նարինե Գրիգորյանը:

Նա շեշտում է՝ բավական մեծ դժվարություններով անկախություն ձեռք բերեցինք, Արցախյան պատերազմում հաղթեցինք, բայց վերջին երեսուն տարվա ընթացքում չկարողացանք հասկանալ, որ կրթվելն ամենակարևոր գործերից մեկն է։

«Եկեք միասին լինենք, ոչ թե ոչնչանանք։ Տեսնելով մեր երկրում ձևավորված ատելության մթնոլորտը՝ ապշում եմ, որ այս աստիճանի պառակտված ու անկիրթ կարող ենք լինել: Այն, ինչ տանն անգամ ամոթ է արտաբերել, մարդիկ գրում են համացանցում. շատ եմ տխրում»,- ասում է Նարինե Գրիգորյանը:

Հարցին, թե ինչպես է վերաբերվում հայաստանյան ներկայիս մթնոլորտին՝ հանրահավաքներ, քաղաքացիների ու ոստիկանների բախումներ, արվեստագետներ, որոնք այնտեղ են և կոչ են անում միանալ, Նարինե Գրիգորյանը պատասխանում է. «Կարելի է գնալ ցույցերի, բայց կա պայքարի ավելի ուժեղ ձև՝ մենք մեզ պետք է փոխենք ու չպառակտվենք: Ես բոլորին եմ սիրում՝ փնովողներին, անհանգստացողներին, անտարբերներին… Իրար ատելը մեզ կործանման կտանի»:

Համազգային թատրոնի գեղարվեստական ղեկավարը խոսում է նաև այսօր Հայաստանում բեմադրվող ներկայացումների մասին։

«Այսօր մեր երկրում, որտեղ շատ կարևոր մեսիջներ կան մարդկանց հասցնելու, չի կարելի «արևածաղկով նայելու» ներկայացումներ բեմադրել: Իսկ, ընդհանուր առմամբ, վերջին տարում մի տեսակ «թևաթափ եղած» ներկայացումներ եմ տեսնում, ինչն ինձ դուր չի գալիս, բայց հասկանալի է՝ պայմանավորված մեր հոգեվիճակով»,- նշում է նա:

Մանրամասները՝ տեսանյութում:

Աննա Բաբաջանյան