16.11.2024 | 13:49
Վանաձորում ձին ընկել է դիտահորը
Կհաջողվի՞ արդյոք Ռոբերտ Քոչարյանին հատել Հայաստանի սահմանը․ նրա դիվանագիտական անձնագիրը քննչական մարմնում է
Քաղաքականություն
03.09.2018 | 17:30
Համացանցում շրջանառվում են լուրեր, որ ՀՀ 2-րդ նախագահ Ռոբերտ Քոչարյանը Հայաստանից մեկնել է։ Ռոբերտ Քոչարյանի գրասենյակի ղեկավար Վիկտոր Սողոմոնյանն էլ, անդրադառնալով այդ լուրերին, նշել է, որ նախագահ Քոչարյանը մի քանի օրով մեկնում է Հայաստանից և իր ուղևորության ժամկետների ու պատճառների մասին անձամբ փաստաբանների ներկայությամբ, գրավոր դիմումով տեղյակ է պահել քննչական մարմնին։
Factor.am-ի հետ զրույցում 2-րդ նախագահի պաշտպաններից Արամ Օրբելյանը հերքեց լուրերը, որ Ռոբերտ Քոչարյանն արդեն մեկնել է երկրից, սակայն նշեց` պատրաստվում է մեկնել։
«Այո’, նա պատրաստվում է մեկնել Մյունխեն բուժզննության նպատակով, ու թեև այդ մասին տեղյակ ենք պահել քննչական մարմնին, սակայն սահմանը հատելու ժամանակ կարող են առաջանալ խնդիրներ՝ կապված նրա դիվանագիտական անձնագրի հետ։ Այս պահին փորձում ենք դրանք ճշտել, կարգավորել, որպեսզի չստացվի այնպես, որ երկրից դուրս գալու ժամանակ սահմանապահների հետ հարցեր առաջանան»,- ասաց պաշտպանը։
ՀՔԾ մամուլի խոսնակ Մարինա Օհանջանյանը մեզ հետ զրույցում հաստատեց տեղեկությունը, որ Ռոբերտ Քոչարյանը Հայաստանում է․ «Սակայն դիվանագիտական անձնագրի հետ կապված այլ մանրամասներ Հատուկ քննչական ծառայությունը չի կարող հայտնել»,- ասաց նա։
Նշենք, որ ավելի վաղ «Հայկական ժամանակ»-ը գրել է, Ռոբերտ Քոչարյանը Հայաստանից չի մեկնել և չի էլ կարող մեկնել, քանի որ նրա դիվանագիտական անձնագիրը գտնվում են իրավապահ մարմինների մոտ:
