30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ոչ ոք ինձ դուրս չի մղում․ Բայդենը հայտարարել է, որ չի լքելու ընտրապայքարը
Քաղաքականություն
04.07.2024 | 15:25
ԱՄՆ նախագահ Ջո Բայդենը նախօրեին փորձել է ցրել դեմոկրատների և իր նախընտրական շտաբի մտահոգությունները, քանի որ լուրեր էին շրջանառվում, թե նա կշռադատում է ընտրապայքարում իր ապագան անցյալ շաբաթ Դոնալդ Թրամփի հետ բանավեճից հետո, գրում է BBC-ն։
Նշվում է, որ Բայդենը Սպիտակ տանը մասնավոր ճաշ է անցկացրել ԱՄՆ փոխնախագահ Քամալա Հարիսի հետ՝ շահարկումների ֆոնին՝ արդյո՞ք նա կփոխարինի գործող նախագահին որպես կուսակցության թեկնածու նոյեմբերին նախանշված ընտրություններում:
Ավելի ուշ նրանք միացել են Դեմոկրատական կուսակցության ավելի մեծ խմբին, որտեղ Բայդենը հստակեցրել է, որ մնում է ընտրապայքարում, իսկ Հարիսը կրկնել է իր աջակցությունը:
«Ես Դեմոկրատական կուսակցության թեկնածուն եմ։ Ոչ ոք ինձ դուրս չի մղում: Ես չեմ հեռանում»,- ըստ BBC-ի աղբյուրների՝ ասել է Ջո Բայդենը։
Ըստ լրատվամիջոցի՝ կասկածներ կային՝ արդյո՞ք 81-ամյա նախագահը կշարունակի իր քարոզարշավը Թրամփի հետ բանավեճից հետո։ Սա դեմոկրատների շրջանում մտահոգություն է առաջացրել պաշտոնին նրա համապատասխանության և ընտրություններում հաղթելու կարողության վերաբերյալ:
CBS News-ի հրապարակած առանձին հարցումը ցույց է տվել, որ առանցքային նահանգներում Թրամփն առաջ է Բայդենից երեք կետով: Այդ հարցումը ցույց է տվել, որ նախկին նախագահը նաև առաջատար է ազգային մակարդակով։ Հարցումներին ավելացել են որոշ դեմոկրատ դոնորներն և օրենսդիրները, որոնք հրապարակայնորեն նախագահին կոչ են արել հետ քաշվել ընտրապայքարից։
Չնայած այս ամենին՝ Սպիտակ տունը և Բայդենի քարոզարշավի ներկայացուցիչները կտրականապես հերքել են լուրերը, որ նա ակտիվորեն կշռադատում է իր ապագան՝ նշելով, որ նա վճռական է նոյեմբերի 5-ին Թրամփին երկրորդ անգամ հաղթելու հարցում:
