24.04.2026 | 00:23
Սպերցյանի գոլն օգնել է «Կրասնոդարին» հաղթել «Սպարտակին»․ ՏԵՍԱՆՅՈՒԹ
Կողմնակից ենք Հարավային Կովկասում համագործակցության ինտեգրված մոդելին՝ առանց բաժանարար գծերի․ Ալիևը՝ Բայդենին
Քաղաքականություն
04.07.2024 | 13:24
Ադրբեջանի նախագահ Իլհամ Ալիևը շնորհավորական նամակ է հղել ԱՄՆ նախագահ Ջո Բայդենին Անկախության օրվա առթիվ։ Նա նշել է, որ Ադրբեջանը հատուկ նշանակություն է տալիս ԱՄՆ-ի հետ հարաբերություններին։
«Մեր երկրները միշտ սերտորեն համագործակցել են տարածաշրջանային բարդ մարտահրավերների լուծման, ահաբեկչության դեմ պայքարի և միջազգային անվտանգության խնդիրների լուծման գործում։ Առանձնահատուկ նշանակություն ունի մեր երկարաժամկետ և արդյունավետ համատեղ գործունեությունը էներգետիկայի ոլորտում։ Մենք բարձր ենք գնահատում Միացյալ Նահանգների վճռական աջակցությունը Ադրբեջանի էներգետիկ ռազմավարության և Հարավային գազային միջանցքի իրականացմանը»,- նշում է Ալիևը։
Նա ընդգծել է, որ Բաքուն պատրաստ է Վաշինգտոնի հետ համատեղ ջանքեր գործադրել փոխադարձ հետաքրքրություն ներկայացնող բոլոր ոլորտներում, հատկապես՝ կլիմայի փոփոխության և կանաչ էներգիային անցնելու հարցերում։
Ալիևն անդրադարձել է նաև տարածաշրջանային գործընթացներում, հատկապես՝ ՀՀ-ի հետ հարաբերությունների կարգավորման գործընթացում ԱՄՆ-ի դերակատարմանը՝ հերթական անգամ նաև դժգոհություն հայտնելով։
«Ադրբեջանը նոր աշխարհաքաղաքական իրողությունների և Հարավային Կովկասում արդարության վրա հիմնված տարածաշրջանային համագործակցության ինտեգրված և ներառական մոդելի կառուցման կողմնակից է՝ առանց բաժանարար գծերի։ Որպես Հայաստանի հետ խաղաղության համաձայնագրի և դրա հիմքում ընկած 5 սկզբունքների նախաձեռնող՝ Ադրբեջանը մշտապես քաղաքական կամք է դրսևորում՝ առաջ մղելու խաղաղության օրակարգը։ Մենք բարձր ենք գնահատում Միացյալ Նահանգների վճռականությունը՝ մշտապես աջակցելու Հայաստանի հետ հարաբերությունների կարգավորմանը, տարածաշրջանում կայուն խաղաղության հաստատմանը, խաղաղության պայմանագրի պատրաստման գործընթացին»,-հայտարարել է Ադրբեջանի նախագահը։
Նշվել է, որ մեծ հեռանկարներ կան փոխշահավետ տնտեսական և առևտրային հարաբերությունների դիվերսիֆիկացման համար, հատկապես՝ բարձր տեխնոլոգիաների, գյուղատնտեսության, ներդրումների, ավիացիայի և այլ ոլորտներում համագործակցության զարգացման համար։
Ալիևը վստահություն է հայտնում, որ կողմերը կշարունակեն «համատեղ ջանքերը հաջողությամբ շարունակելու սերտ համագործակցությունը Ադրբեջանի և ԱՄՆ-ի միջև, որոնք բարեկամներ և գործընկերներ են»։
