11.08.2026 | 13:40
TRIPP-ի շրջանակներում ՀՀ տարածքով գազամուղ է անցնելու, հնարավորություն է ևս մեկ աղբյուրի․ Խանդանյան․ ՏԵՍԱՆՅՈՒԹ
Մեքքայում շոգից առնվազն 550 ուխտավոր է մահացել հաջի ժամանակ
Քաղաքականություն
19.06.2024 | 15:25
Սաուդյան Արաբիայում Մեքքա մահմեդականների ամենամյա ուխտագնացության՝ հաջի ժամանակ ծայրահեղ շոգից հարյուրավոր մարդիկ են մահացել։ Այս մասին հայտնում են տարբեր ԶԼՄ-ներ՝ վկայակոչելով դիվանագետներին, գրում է DW-ի ռուսական ծառայությունը։
Զոհերի ճշգրիտ թիվը հայտնի չէ, սակայն, ըստ AFP-ի, միայն հաջի ժամանակ զոհվել է առնվազն 550 մարդ, այդ թվում՝ 323 ուխտավոր Եգիպտոսից։
«Tunis Afrique Presse» գործակալության փոխանցմամբ՝ զոհերի թվում են երկրի 35 քաղաքացիներ։ Հորդանանի ԱԳՆ-ն էլ հայտարարել է հորդանանցի ուխտավորների համար 41 թաղման թույլտվության տրամադրման մասին։
Իրանական IRNA լրատվական գործակալությունն իր հերթին հաղորդդել է 11 իրանցիների մահվան մասին, ևս 24-ը հոսպիտալացվել է։ Հաղորդվում է նաև Սենեգալի 3 և Ինդոնեզիայի 144 քաղաքացիների մահվան մասին։
Հարազատները սոցցանցերում հայտնում են, որ այս մարդկանց մեծ մասը մահացել է ծայրահեղ շոգից։
Սաուդյան Արաբիայի Առողջապահության նախարարությունը հայտնել է, որ իշխանությունները ծայրահեղ բարձր ջերմաստիճանի պայմաններում ուխտավորների շրջանում որևէ արտասովոր մահվան դեպք չեն հայտնաբերել: Սաուդական հեռուստատեսության հաղորդմամբ՝ հունիսի 17-ին Մեքքայի մեծ Մասջիդ ալ-Հարամ մզկիթում ստվերում ջերմաստիճանը կազմել է 51,8 աստիճան։ Ավելի քան 2700 ուխտավորներ բժշկական օգնություն են ստացել ուժեղ գերտաքացման պատճառով առաջացած բարդությունների պատճառով։
Այս տարի ամենամյա հաջը սկսվել է հունիսի 14-ին և ավարտվելու է հունիսի 19-ի երեկոյան: Սաուդյան Արաբիայի վիճակագրության վարչության տվյալներով՝ հաջին մասնակցում է 1,8 միլիոն ուխտավոր։
Վերջին 30 տարիների ընթացքում էլ հարյուրավոր մարդիկ են զոհվել հաջի ժամանակ զանգվածային հրմշտոցների, վրաններում հրդեհների և այլ պատահարների պատճառով:
