07.10.2026 | 15:44
ԱՄՆ-ում մահապատժի ընթացքում ողջ մնացած կինը գիտակցության է եկել
Բելառուսում հինգ քաղաքացի մինչև 2 տարվա ազատազրկման է դատապարտվել՝ 2020թ․ բողոքի ցույցերին մասնակցելու համար
Քաղաքականություն
18.06.2024 | 22:24
Բելառուսում Մոգիլևի Լենինյան շրջանային դատարանը տեղի հինգ բնակիչների դատապարտել է 2 տարվա ազատազրկման՝ 2020 թվականի բողոքի ցույցերին մասնակցելու համար, հաղորդում է MAYDAY իրավապաշտպան նախագիծը։
Գործով մեղադրյալներ Անդրեյ Տիմոնինը, Վալերի Իվչինը, Միխայիլ Պիշչալոն, Սվետլանա և Դենիս Կոտովները մեղավոր են ճանաչվել կարգուկանոնի կոպիտ խախտման մեջ (Բելառուսի Հանրապետության քրեական օրենսգրքի 342-րդ հոդվածի 1-ին մաս), գրում է Current Time-ը:
Դատարանը փաստացի պատիժ է նշանակել Անդրեյ Տիմոնինին՝ երկու տարի ընդհանուր ռեժիմի գաղութում։ Վալերի Իվչինին և Դենիս Կոտովին դատարանը դատապարտել է երկու տարի վեց ամիս ժամկետով «քիմիայի» (ազատության սահմանափակում՝ բաց ուղղիչ հիմնարկի նշանակմամբ), իսկ Սվետլանա Կոտովային և Միխայիլ Պիշչալոյին՝ երկու տարվա «տնային քիմիայի» (ազատության սահմանափակում առանց ուղղիչ հիմնարկ ուղարկելու):
Հետաքննությունը պնդում էր, որ 2020 թվականի օգոստոսին և սեպտեմբերին մեղադրյալները, իբր, Մինսկում մասնակցել են երթերի, «դուրս են եկել ճանապարհի երթևեկելի հատված» և «արգելափակել երթևեկությունը»։
Իրավապաշտպանների հաղորդմամբ՝ դատավարության ընթացքում բոլոր ամբաստանյալներն ընդունել են իրենց մեղքը։
Բելառուսում արդեն չորս տարի է՝ բռնաճնշումներ են իրականացվում. նախագահական ընտրություններից և դրան հաջորդած զանգվածային ցույցերից հետո ավելի քան 38 հազար մարդ կալանավորվել է, առնվազն հարյուր հազարը լքել է երկիրը՝ վախենալով կամայական կալանքից, վատ վերաբերմունքից և անարդար դատավարություններից։
