Հրազդանը և Մոնպելիեն հռչակվել են քույր քաղաքներ

Հրազդան համայնքի ղեկավար Սևակ Միքայելյանն ընդունել է Ֆրանսիայի Հանրապետության Մոնպելիե քաղաքից ժամանած պատվիրակությանը՝ Հայաստանում Ֆրանսիայի Հանրապետության արտակարգ և լիազոր դեսպան Օլիվիե Դըկոտինյիի ուղեկցությամբ։ Այս մասին Սևակ Միքայելյանը տեղեկացրել է ֆեյսբուքյան իր էջում։

Հրազդանի համայնքապետարանում ստորագրվել է համագործակցության հուշագիր, ըստ որի՝ Հրազդան և ֆրանսիական Մոնպելիե քաղաքների միջև հաստատվել են բարեկամական հարաբերություններ։

«Պատվիրակության կազմում էին Մոնպելիեի փոխքաղաքապետ և Մոնպելիեի միջերկրական մետրոպոլիայի փոխնախագահ Քլեր Հարթը, քաղաքապետարանի պաշտոնատար անձինք, Մոնպելիեի փաստաբանական պալատի անդամներ, որոնց թվում էր Մոնպելիեում բնակվող և ծնունդով Հրազդանցի Նաիրա Զորոյանը։

Այցի նպատակը Հրազդան և Մոնպելիե քաղաքների միջև համագործակցության հուշագրի ստորագրումն էր։
Ողջունելոբ հյուրերին՝ համայնքի ղեկավարն արժևորել է Ֆրանսիայի Հանրապետության և Հայաստանի Հանրապետության բարեկամական ամուր կապերը, երախտագիտությամբ փաստել, որ Ֆրանսիան եղել և շարունակում է մնալ Հայաստանի կողքին։

Դեսպան Դըկոնտինյին գուհունակություն է հայտնել ջերմ ընդունելության համար՝ կարևորելով Ֆրանսիայի և Հայստանի միջև եղած դարավոր բարեկամական կապը։  Սևակ Միքայելյանը շնորհակալություն է հայտնել նաև Նաիրա Զորոյանին՝ երկու քաղաքների միջև բարեկամական կապերի հաստատմանը նպաստելու համար։

Համայնքի ղեկավարը համոզմունք է հայտնել, որ երկու քաղաքների միջև ձևավորված բարեկամական կապերը վստահաբար զարգանալու են, ինչն էլ նպաստելու երկու քաղաքների փոխճանաչմանը և առաջընթացին։

Ընդլայնված հանդիպմանը հաջորդել է համագործակցության հուշագրի ստորագրման պաշտոնական արարողությունը, որով Հրազդանն ու Մոնպելիեն հռչակվել են քույր քաղաքներ։

Համայնքի ղեկավար Սևակ Միքայելյանի ուղեկցությամբ պատվիրակության անդամներն այց են կատարել Հրազդանի Արտակ Ռաֆայելյանի անվան մանկապատանեկան մարզադպրոց, շրջայց կատարել և հանձնառություն ստանձնել առաջիկայում գտնել տարբերակներ՝ դպրոցի վերանորոգմանը աջակցելու համար»,- ասված է համյնքապետարանի տարածած հաղորդագրության մեջ։