Թուրքիայում ազատություն չի լինի, քանի դեռ քրդական հարցը չի լուծվել․ քրդամետ կուսակցության համանախագահ

Թուրքական գլխավոր քրդամետ կուսակցության առաջնորդ Թուլայ Հաթիմուղուլլարին Հաքքարի քուրդ քաղաքապետի պաշտոնանկության դեմ բողոքի ցույցի ժամանակ հայտարարել է, որ Թուրքիայում ազատություն չի լինի՝ առանց քրդական հարցի լուծման, գրում է Rudaw-ն։

Նշենք, որ մարտի 31-ի ՏԻՄ ընտրություններում հաղթած Հաքքարիի 53-ամյա քաղաքապետ Մեհմեթ Սիդդիք Աքըշը ձերբակալվել է հունիսի 3-ին՝ Քուրդիստանի աշխատավորական կուսակցության (PKK) գործունեության մեջ բարձր մակարդակով դերակատարություն ունենալու մեղադրանքով։ Այնուհետև դատարանը Ժողովուրդների իրավահավասարություն և ժողովրդավարություն կուսակցության (DEM ) քաղաքապետին դատապարտել է 19 տարի 6 ամիս ժամկետով ազատազրկման։ Նա հեռացվել է նաև զբաղեցրած պաշտոնից, նրա փոխարեն նշանակվել է պետական ​​հոգաբարձու:

DEM կուսակցությունը դեմ է արտահայտվել հոգաբարձուի նշանակմանը և ցույցեր է կազմակերպել մի շարք նահանգներում՝ ի նշան բողոքի։ Նախօրեին էլ Հաքքարիի փողոցներում հավաքվել են կուսակցության առաջնորդներ և հազարավոր համակիրներ։

«Քանի դեռ քրդական հարցը չի լուծվել քաղաքական երկխոսության միջոցով խաղաղության և ժողովրդավարության հիման վրա, ո՛չ աշխատողները, ո՛չ բանվորները, ո՛չ կանայք, ո՛չ երիտասարդները, այլ կերպ ասած՝ մենք՝ Թուրքիայի ժողովուրդներս, չենք կարողանա հասնել ազատության»,- հանրահավաքի ժամանակ ասել է DEM կուսակցության համանախագահ Թուլայ Հաթիմուղուլլարին։

Հաքքարիի հավաքին ընդառաջ՝ թուրքական ոստիկանությունը տեղակայվել է փողոցներում՝ հավաքը կանխելու համար, քանի որ բողոքի ակցիաներն ու հասարակական հավաքներն արգելվել են ամբողջ նահանգում։ Հաթիմուղուլլարին ոստիկանների տեղակայումն անվանել է «ռազմական հեղաշրջում»:

Հաքքարիի քաղաքապետից բացի՝ թուրքական դատարանը կալանավորել է նաև վեց քաղաքական գործիչների՝ հիմնականում քրդաբնակ Դիարբեքիր նահանգի նախկին քաղաքապետերին ու նրանց տեղակալներին, որոնք հունիսի 8-ին ձերբակալվել էին երկրում քուրդ քաղաքական գործիչների դեմ շարունակվող բռնաճնշումների շրջանակում։ Նրանց թվում են Էրգանի շրջանի նախկին համաքաղաքապետ Ահմեթ Քայան, նախկին համաքաղաքապետեր Ռամազան Քարթալմըշը և Ֆեսիհ Յալչընը և փոխքաղաքապետեր Գյուլիստան Փոլաթը, Էսվեր Մալքոչը և Ջավիդան Յամանը։ Քաղաքական գործիչները մեղադրվում են «ահաբեկչական կազմակերպությանն անդամակցելու» մեջ։

Էմմա Չոբանյան