07.10.2026 | 10:36
Փաշինյանի ՌԴ այցը դեռ չի քննարկվում, Պուտինի հետ հանդիպում Թուրքմենստանում չի նախատեսվում․ Ուշակով
Եթե Ուկրաինան ընկնի, Լեհաստանը և Բալթյան երկրները կկանգնեն ռուսական հարձակման անմիջական վտանգի առաջ. Սիկորսկի
Քաղաքականություն
10.06.2024 | 21:28
Լեհաստանը Ռուսաստանին տեսնում է որպես սպառնալիք, որը չի կարելի անտեսել։ Վարշավայում լրագրողների հետ ճեպազրույցում այս մասին հայտարարել է երկրի արտգործնախարար Ռադոսլավ Սիկորսկին, փոխանցում է BBC-ի ռուսական ծառայությունը:
Արևմտյան առաջնորդները վերջերս հայտարարեցին, որ լրջորեն քննարկում են ՆԱՏՕ-ի սահմանային երկրների վրա Ռուսաստանի հարձակման սպառնալիքը։ Սիկորսկին համաձայն է այս մտահոգությունների հետ։
«Եթե Ուկրաինան ընկնի, Լեհաստանը և Բալթյան երկրները կկանգնեն ռուսական հարձակման անմիջական սպառնալիքի առաջ»,- ասել է նա։
Ըստ պաշտոնյայի՝ Լեհաստանի իշխանությունները սկսել են ամրացնել սահմանը, բացի այդ, պաշտպանության վրա ծախսում են ՀՆԱ-ի 4 տոկոսը։
Անցյալ շաբաթ արտասահմանյան լրագրողների հետ զրույցում ՌԴ նախագահ Վլադիմիր Պուտինն «անհեթեթություն» է անվանել ՆԱՏՕ-ի երկրների վրա հարձակվելու՝ Ռուսաստանի ծրագրերի մասին խոսակցությունները:
Խոսելով Ռուսաստանի հետ ապագա հարաբերությունների մասին՝ Սիկորսկին ասել է, որ «Լեհաստանի իշխանությունները բոլոր ռուսներին չեն նույնացնում Պուտինի ռեժիմի հետ» և «չեն կորցրել հավատն ապագայում ժողովրդավարական Ռուսաստանի ի հայտ գալու հարցում»։
«Ռուսաստանը միշտ կմնա մեր ամենամոտ հարևանը, և մենք հուսով ենք, որ նա կլինի խաղաղ և բարեկամական հարևան»,- ընդգծել է Լեհաստանի արտգործնախարարը։
