Մհեր Գրիգորյանը շուրջ կես մլն դոլարով «Արդշինբանկ»-ի պարտատոմսեր է գնել․ ինչ է հայտարարագրել փոխվարչապետը

ՀՀ փոխվարչապետ Մհեր Գրիգորյանը 2023 թվականի դեկտեմբերին 511 հազար 700 դոլարով ձեռք է բերել «Արդշինբանկ» ՓԲԸ-ի պարտատոմսեր։ Մինչ այդ, հիշեցնենք, Գրիգորյանը «Արդշինբանկի» 1.000056 %-ի բաժնետերն էր։ Այս բաժնետոմսերը նա գնել էր 2017 թ-ին «Արինս Գրուպ» ՍՊԸ-ից և «Ռեգիոն ֆինանսական արդյունաբերական կորպորացիա» ՓԲԸ-ից, որոնք «Արդշինբանկի» 97․4 %-ի սեփականատերն էին։ 2022 թ-ին փոխվարչապետը վաճառել էր իր բաժնետոմսերը 502․3 մլն դրամով։

Փոխվարչապետն «Արդշինբանկում» նաև 2 ավանդ ունի՝ 525 հազար դոլար և 40 մլն դրամ։

Նրա գույքի եկամուտների հայտարարագրից տեղեկանում ենք, որ անցած տարի Գրիգորյանը նույնությամբ պահպանել է իր անշարժ գույքը․ նա Երևանի կենտրոնում ունի բնակարան և 2 ավտոտնակ, առանձնատուն և հողամաս Աշտարակում։ Չնայած 2 ավտոտնակների առկայությանը, Գրիգորյանն ավտոմեքենա չունի։
Տարեվերջին նրա բանկային հաշվին եղել է 4․6 մլն դրամ։ Ուշագրավ է, որ անկանխիկ գործարքների ջատագով կառավարության փոխվարչապետն առնվազն 5 տարի շարունակ 70 մլն դրամ կանխիկ է պահում։
2023 թ-ին Մ․ Գրիգորյանն ստացել է գրեթե 30 մլն դրամ եկամուտ, որից 24 մլն դրամը նրա աշխատավարձն է, ևս 327 հազար դրամ և 14․5 հազար դոլար «Արդշինբանկին» տրված փոխառությունների դիմաց տոկոս է։

Փոխվարչապետը 71 հազար եվրո նվեր է ընծայել։ Թե ում է նման նվեր մատուցել Մհեր Գրիգորյանը, հայտարարագրում չի նշվում։

Փոխվարչապետի կինը՝ Աննա Գրիգորյանը, 2023 թ-ի գույքի և եկամուտների հայտարարագիր դեռևս չի ներկայացրել։

Գրիգորյանների դուստրը՝ Եվա Գրիգորյանը, 2023 թ-ին նոր աշխատանքի է անցել՝ Կենտրոնական բանկում՝ որպես հասարակայնության հետ կապերի ծառայության մասնագետ։ Factor.am-ի տեղեկություններով նա հավակնում է ԿԲ հասարակայնության հետ կապերի ծառայության ղեկավարի պաշտոնին, որը տևական ժամանակ է՝ թափուր է։ 2022 թ-ի տարեվերջին Եվա Գրիգորյանը գնել է MERCEDES-BENZ մակնիշի նոր ավտոմեքենա։ Նրա եկամուտը միայն ԿԲ-ից ստացած աշխատավարձն է եղել՝ մոտ 2․7 մլն դրամ։

Գայանե Խաչատրյան